wo aaen ub gae hain jo dahr mein apne

vo aa.eñ uub ga.e haiñ jo dahr meñ apne

maiñ ek dasht banātā huuñ shahr meñ apne

kisī kī yaad bhañvar ban ke is tarah lipTī

ki paañv chhoḌ hī aayā maiñ nahr meñ apne

sabhī ko baañT ke shakleñ ḳhudī rahe be-shakl

hamīñ akele musavvir the shahr meñ apne

ginūñ jo phir se inheñ ab to baḌh ga.e hoñge

gine haiñ zaḳhm abhī pichhle pahr meñ apne

ġhazal kā zā.iqa marte samay bhī taaza rahe

shakar milā.ī hai so ham ne zahr meñ apne

'charāġh' ham se adīboñ ne fāsla rakkhā

tamām she'r the hālāñki bahr meñ apne

wo aaen ub gae hain jo dahr mein apne

main ek dasht banata hun shahr mein apne

kisi ki yaad bhanwar ban ke is tarah lipTi

ki panw chhoD hi aaya main nahr mein apne

sabhi ko banT ke shaklen KHudi rahe be-shakl

hamin akele musawwir the shahr mein apne

ginun jo phir se inhen ab to baDh gae honge

gine hain zaKHm abhi pichhle pahr mein apne

ghazal ka zaiqa marte samay bhi taza rahe

shakar milai hai so hum ne zahr mein apne

'charagh' hum se adibon ne fasla rakkha

tamam she'r the haalanki bahr mein apne