wo aaenge to khilenge nashat-e-wasl ke phul

vo ā.eñge to khileñge nashāt-e-vasl ke phuul

shab-e-firāq meñ un kī saḳhāvatoñ ko na bhuul

yahī hai kyā tirī taqsīm-e-gulsitāñ kā usuul

kisī ko phuul mileñ aur kisī ko ḳhaar babūl

zamīñ kā rañg to ham-rañg-e-dām hotā hai

bhaTak na jaa.eñ kahīñ merī chāhatoñ ke rasūl

tumhāre paas to sim-sim kā ism-e-āzam hai

ye kyā ki band hai apne liye hī bāb-e-qubūl

kisī kā dīda-e-ḳhūnīñ bhī rañg lā na sakā

kisī ke shola-e-tan se pighal ga.e haiñ usuul

bujhā.eñ pyaar mohabbat ke shabnamistāñ se

na baiTh jaa.e gul-e-jāñ pe nafratoñ kī ye dhuul

bharī bahār meñ jaise phuvār paḌtī hai

kuchh is tarah mire dil par hai shā.irī kā nuzūl

ulajh ga.e kabhī sañgīñ haqīqatoñ se 'jamīl'

kabhī kisī ke tasavvur se ho ga.e haiñ malūl

wo aaenge to khilenge nashat-e-wasl ke phul

shab-e-firaq mein un ki saKHawaton ko na bhul

yahi hai kya teri taqsim-e-gulsitan ka usul

kisi ko phul milen aur kisi ko KHar babul

zamin ka rang to ham-rang-e-dam hota hai

bhaTak na jaen kahin meri chahaton ke rasul

tumhaare pas to sim-sim ka ism-e-azam hai

ye kya ki band hai apne liye hi bab-e-qubul

kisi ka dida-e-KHunin bhi rang la na saka

kisi ke shola-e-tan se pighal gae hain usul

bujhaen pyar mohabbat ke shabnamistan se

na baiTh jae gul-e-jaan pe nafraton ki ye dhul

bhari bahaar mein jaise phuwar paDti hai

kuchh is tarah mere dil par hai shairi ka nuzul

ulajh gae kabhi sangin haqiqaton se 'jamil'

kabhi kisi ke tasawwur se ho gae hain malul