wo aalam hai ki har mauj-e-nafas hai ruh par bhaari

vo 'ālam hai ki har mauj-e-nafas hai ruuh par bhārī

ḳhudā jaane ye jiinā hai ki jiine kī adākārī

ḳhudā-vandā tire zauq-e-atā ko kyā kahe koī

milī hai ham se ḳhufta-qismatoñ ko dil kī bedārī

Darātā kyā dil-e-sarkash ko ehsās-e-sazā lekin

laraz jaatā hai nām-e-afv se nāz-e-ḳhatā-kārī

nazar uTThī kisī kī dil ne ik paiġhām sā paayā

ye lamha hai ki ham uḌtī huī sī koī chingārī

uThā.e zindagī kā bojh baḌhtā jā rahā huuñ maiñ

tamannā-e-subuk-sārī na ehsās-e-girāñbārī

miTā.ī jā.egī ye muskurātī nāchtī duniyā

azal se sirf ik din ke liye kyā kyā hai tayyārī

farishte rashk se kyā kyā na takte haiñ use 'hurmat'

koī kartā hai pahlī baar jab azm-e-gunahgārī

wo 'alam hai ki har mauj-e-nafas hai ruh par bhaari

KHuda jaane ye jina hai ki jine ki adakari

KHuda-wanda tere zauq-e-ata ko kya kahe koi

mili hai hum se KHufta-qismaton ko dil ki bedari

Daraata kya dil-e-sarkash ko ehsas-e-saza lekin

laraz jata hai nam-e-afw se naz-e-KHata-kari

nazar uTThi kisi ki dil ne ek paigham sa paya

ye lamha hai ki hum uDti hui si koi chingari

uThae zindagi ka bojh baDhta ja raha hun main

tamanna-e-subuk-sari na ehsas-e-giranbari

miTai jaegi ye muskuraati nachti duniya

azal se sirf ek din ke liye kya kya hai tayyari

farishte rashk se kya kya na takte hain use 'hurmat'

koi karta hai pahli bar jab azm-e-gunahgari