wo aankh ajab rau mein baha le gai hum ko

vo aañkh ajab rau meñ bahā le ga.ī ham ko

ik mauj thī sāhil se uThā le ga.ī ham ko

kab shauq se jaatā hai koī rāh-e-junūñ par

vo to tirī nazroñ kī ḳhatā le ga.ī ham ko

is shahr meñ ham jurm-e-mohabbat ke liye aa.e

aur dasht meñ taqsīr-e-vafā le ga.ī ham ko

ham kaun qalandar the ki jā milte ḳhudā se

par ik but-e-kāfir kī duā le ga.ī ham ko

ik ziist hameñ jis ne kahīñ kā nahīñ rakkhā

ik maut ki siine se lagā le ga.ī ham ko

le jaatā thā har yaar hameñ apnā samajh kar

phir yuuñ huā ik roz qazā le ga.ī ham ko

ḳhushbū tire āñchal kī thī yā tere badan kī

sañg apne bahar-hāl uḌā le ga.ī ham ko

ham dil the aur ik dil ke liye aa.e the 'sāgar'

par mauj-e-ġham-e-dahr bahā le ga.ī ham ko

wo aankh ajab rau mein baha le gai hum ko

ek mauj thi sahil se uTha le gai hum ko

kab shauq se jata hai koi rah-e-junun par

wo to teri nazron ki KHata le gai hum ko

is shahr mein hum jurm-e-mohabbat ke liye aae

aur dasht mein taqsir-e-wafa le gai hum ko

hum kaun qalandar the ki ja milte KHuda se

par ek but-e-kafir ki dua le gai hum ko

ek zist hamein jis ne kahin ka nahin rakkha

ek maut ki sine se laga le gai hum ko

le jata tha har yar hamein apna samajh kar

phir yun hua ek roz qaza le gai hum ko

KHushbu tere aanchal ki thi ya tere badan ki

sang apne bahar-haal uDa le gai hum ko

hum dil the aur ek dil ke liye aae the 'sagar'

par mauj-e-gham-e-dahr baha le gai hum ko