wo aankh mere liye nam hai kya kiya jae

vo aañkh mere liye nam hai kyā kiyā jaa.e

use bhī aaj mirā ġham hai kyā kiyā jaa.e

tire baġhair kahīñ merā jī nahīñ lagtā

tire baġhair ye aalam hai kyā kiyā jaa.e

sahar qarīb hai ab kyā vo ā.eñge milne

umīd-e-vasl bahut kam hai kyā kiyā jaa.e

ḳhatā maaf ḳhatā.eñ to ham se hoñgī zarūr

ki ye to fitrat-e-ādam hai kyā kiyā jaa.e

ilāhī ab koī chāra nahīñ duā ke sivā

marīz-e-hijr lab-e-dam hai kyā kiyā jaa.e

vo mujh se milne ko aa.e haiñ merī maut ke ba.ad

ḳhushī bhī mere liye ġham hai kyā kiyā jaa.e

baraste rahte haiñ din raat hijr meñ 'purnam'

ye hāl-e-dīda-e-pur-nam hai kyā kiyā jaa.e

wo aankh mere liye nam hai kya kiya jae

use bhi aaj mera gham hai kya kiya jae

tere baghair kahin mera ji nahin lagta

tere baghair ye aalam hai kya kiya jae

sahar qarib hai ab kya wo aaenge milne

umid-e-wasl bahut kam hai kya kiya jae

KHata maf KHataen to hum se hongi zarur

ki ye to fitrat-e-adam hai kya kiya jae

ilahi ab koi chaara nahin dua ke siwa

mariz-e-hijr lab-e-dam hai kya kiya jae

wo mujh se milne ko aae hain meri maut ke baad

KHushi bhi mere liye gham hai kya kiya jae

baraste rahte hain din raat hijr mein 'purnam'

ye haal-e-dida-e-pur-nam hai kya kiya jae