wo aarzu ki dilon ko udas chhoD gai

vo aarzū ki diloñ ko udaas chhoḌ ga.ī

mirī zabāñ pe suḳhan kī miThās chhoḌ ga.ī

likhī ga.ī hai mirī sub.h ke muqaddar meñ

vo raushnī jo kiran kā libās chhoḌ ga.ī

uThī thī mauj jo mahtāb ke kināre se

zamīñ ke gird falak kī asaas chhoḌ ga.ī

ye kis maqām-e-tamannā se be-ḳhudī guzrī

ye kis kā naam pas-e-iltimās chhoḌ ga.ī

charāġh-e-zīst se utrī thī ek harf kī lau

jilau meñ apnī mirā iqtibās chhoḌ ga.ī

guzar ga.ī hai ufuq se sipāh-e-shab lekin

javār-e-sub.h meñ ḳhauf-o-hirās chhoḌ ga.ī

ghaTā uThī thī kisī tishnagī ke sahrā se

jo qatra qatra samundar kī pyaas chhoḌ ga.ī

mirī ḳhamosh-labī mujh meñ raat bhar gūñjī

sadā.eñ kitnī mire ās-pās chhoḌ ga.ī

ye kis ḳhayāl kī parchhā.īñ thī muñDeroñ par

tamām shahr ko mahv-e-qayās chhoḌ ga.ī

basī jo aa ke zamīñ meñ 'samad' shanāḳht mirī

mire badan meñ sajā kar havās chhoḌ ga.ī

wo aarzu ki dilon ko udas chhoD gai

meri zaban pe suKHan ki miThas chhoD gai

likhi gai hai meri subh ke muqaddar mein

wo raushni jo kiran ka libas chhoD gai

uThi thi mauj jo mahtab ke kinare se

zamin ke gird falak ki asas chhoD gai

ye kis maqam-e-tamanna se be-KHudi guzri

ye kis ka nam pas-e-iltimas chhoD gai

charagh-e-zist se utri thi ek harf ki lau

jilau mein apni mera iqtibas chhoD gai

guzar gai hai ufuq se sipah-e-shab lekin

jawar-e-subh mein KHauf-o-hiras chhoD gai

ghaTa uThi thi kisi tishnagi ke sahra se

jo qatra qatra samundar ki pyas chhoD gai

meri KHamosh-labi mujh mein raat bhar gunji

sadaen kitni mere aas-pas chhoD gai

ye kis KHayal ki parchhain thi munDeron par

tamam shahr ko mahw-e-qayas chhoD gai

basi jo aa ke zamin mein 'samad' shanaKHt meri

mere badan mein saja kar hawas chhoD gai