wo aasman hai to ho main zamin hun KHush hun

vo āsmāñ hai to ho maiñ zamīn huuñ ḳhush huuñ

anā ke shahr meñ jab se makīn huuñ ḳhush huuñ

ye jāntī huuñ ke rahte haiñ saañp is meñ magar

abhī bhī pahne vahī āstīn huuñ ḳhush huuñ

ḳhizāñ ke dasht meñ jashn-e-bahār bhī hogā

na jaane kis liye yuuñ pur-yaqīn huuñ ḳhush huuñ

sunā hai chhoḌ ke mujh ko vo kuchh udaas sā hai

maiñ us kī yaad kī ab tak amiin huuñ ḳhush huuñ

zamāna zāhirī sūrat meñ aib DhūñDhtā hai

mujhe gumāñ hai ki dil se hasīn huuñ ḳhush huuñ

vo āftāb hai charchā hai chaar sū us kā

maiñ ik charāġh huuñ gosha-nashīn huuñ ḳhush huuñ

'hinā' pe rañg-e-ibādat faqat ḳhudā kā rahā

vo sajda-rez munavvar-jabīn huuñ ḳhush huuñ

wo aasman hai to ho main zamin hun KHush hun

ana ke shahr mein jab se makin hun KHush hun

ye jaanti hun ke rahte hain sanp is mein magar

abhi bhi pahne wahi aastin hun KHush hun

KHizan ke dasht mein jashn-e-bahaar bhi hoga

na jaane kis liye yun pur-yaqin hun KHush hun

suna hai chhoD ke mujh ko wo kuchh udas sa hai

main us ki yaad ki ab tak amin hun KHush hun

zamana zahiri surat mein aib DhunDhta hai

mujhe guman hai ki dil se hasin hun KHush hun

wo aaftab hai charcha hai chaar su us ka

main ek charagh hun gosha-nashin hun KHush hun

'hina' pe rang-e-ibaadat faqat KHuda ka raha

wo sajda-rez munawwar-jabin hun KHush hun