wo ab dil se tumhaare ja raha hai

vo ab dil se tumhāre jā rahā hai

tumheñ us kā ḳhayāl ab aa rahā hai

maiñ us ke saath ko tarsā karūñgī

jo mere saath bhī tanhā rahā hai

to ab ye dukh bhī duniyā baañT legī

mujhe is baat kā ġham khā rahā hai

use tum se mohabbat ho ga.ī hai

tumhāre sāmne sharmā rahā hai

bahut se log mujh meñ ro rahe haiñ

bas ik vo hai ki hañstā jā rahā hai

jo raste meñ akelā rah gayā thā

vo sab ko rāsta dikhlā rahā hai

ba-sharte ye ki koī bhī na nikle

har ik darvāza kholā jā rahā hai

mulavvis hai gunāhoñ meñ to vo bhī

ḳhudā kā zikr jo kartā rahā hai

bahāroñ se use kyā lenā denā

jo andar se hī ab murjhā rahā hai

tumheñ achchhī nahīñ lagtī ye duniyā

farishtoñ se ye pūchhā jā rahā hai

ġhazal ke sher to sab ho ga.e haiñ

mukammal ek hī misra rahā hai

wo ab dil se tumhaare ja raha hai

tumhein us ka KHayal ab aa raha hai

main us ke sath ko tarsa karungi

jo mere sath bhi tanha raha hai

to ab ye dukh bhi duniya banT legi

mujhe is baat ka gham kha raha hai

use tum se mohabbat ho gai hai

tumhaare samne sharma raha hai

bahut se log mujh mein ro rahe hain

bas ek wo hai ki hansta ja raha hai

jo raste mein akela rah gaya tha

wo sab ko rasta dikhla raha hai

ba-sharte ye ki koi bhi na nikle

har ek darwaza khola ja raha hai

mulawwis hai gunahon mein to wo bhi

KHuda ka zikr jo karta raha hai

bahaaron se use kya lena dena

jo andar se hi ab murjha raha hai

tumhein achchhi nahin lagti ye duniya

farishton se ye puchha ja raha hai

ghazal ke sher to sab ho gae hain

mukammal ek hi misra raha hai