wo agar ab bhi koi ahd nibhana chahe

vo agar ab bhī koī ahd nibhānā chāhe

dil kā darvāza khulā hai jo vo aanā chāhe

ain mumkin hai use mujh se mohabbat hī na ho

dil bahar-taur use apnā banānā chāhe

din guzar jaate haiñ qurbat ke na.e rañgoñ se

raat par raat hai vo ḳhvāb purānā chāhe

ik nazar dekh mujhe!! merī ibādat ko dekh!!

bhuul pā.egā agar mujh ko bhulānā chāhe

vo ḳhudā hai to bhalā us se shikāyat kaisī?

muqtadir hai vo sitam mujh pe jo Dhānā chāhe

ḳhuun umaD aayā ibārat meñ, varaq chīḳh uThe

maiñ ne vahshat meñ tire ḳhat jo jalānā chāhe

noch Dālūñgī use ab ke yahī sochā hai

gar mirī aañkh koī ḳhvāb sajānā chāhe

wo agar ab bhi koi ahd nibhana chahe

dil ka darwaza khula hai jo wo aana chahe

ain mumkin hai use mujh se mohabbat hi na ho

dil bahar-taur use apna banana chahe

din guzar jate hain qurbat ke nae rangon se

raat par raat hai wo KHwab purana chahe

ek nazar dekh mujhe!! meri ibaadat ko dekh!!

bhul paega agar mujh ko bhulana chahe

wo KHuda hai to bhala us se shikayat kaisi?

muqtadir hai wo sitam mujh pe jo Dhana chahe

KHun umaD aaya ibarat mein, waraq chiKH uThe

main ne wahshat mein tere KHat jo jalana chahe

noch Dalungi use ab ke yahi socha hai

gar meri aankh koi KHwab sajaana chahe