wo agli si ab qadrdani nahin

vo aglī sī ab qadrdānī nahīñ

mohabbat nahīñ mehrbānī nahīñ

bayāñ kyā vo jis meñ ravānī nahīñ

vo talvār kyā jis meñ paanī nahīñ

sunātā huuñ maiñ apnī biitī tumheñ

ye qissa nahīñ ye kahānī nahīñ

mire sar kī ab kyoñ qasam khā.iye

mujhe aap se bad-gumānī nahīñ

hamārā vafāoñ meñ ham-sar kahāñ

tumhārā jafāoñ meñ saanī nahīñ

ta.amul dam-e-qatl kyoñ is qadar

tirī teġh meñ kyā ravānī nahīñ

maiñ faanī sahī lekin ai āsmāñ

vafā to mirī umr-e-fānī nahīñ

vafā maiñ ne chāhī jafā tum ne kī

jo maanī to kuchh baat maanī nahīñ

na marne diyā aur na jiine diyā

koī baat bhī tum ne maanī nahīñ

tire ġhamza-o-ishva-o-nāz kī

zamāne pe kyā hukmarānī nahīñ

payām-e-qazā hai payām-e-qazā

kisī kī javānī javānī nahīñ

mohabbat ye kahtī hai 'mas.ūd' se

koī dāġh-e-dil sī nishānī nahīñ

wo agli si ab qadrdani nahin

mohabbat nahin mehrbani nahin

bayan kya wo jis mein rawani nahin

wo talwar kya jis mein pani nahin

sunata hun main apni biti tumhein

ye qissa nahin ye kahani nahin

mere sar ki ab kyon qasam khaiye

mujhe aap se bad-gumani nahin

hamara wafaon mein ham-sar kahan

tumhaara jafaon mein sani nahin

tamul dam-e-qatl kyon is qadar

teri tegh mein kya rawani nahin

main fani sahi lekin ai aasman

wafa to meri umr-e-fani nahin

wafa main ne chahi jafa tum ne ki

jo mani to kuchh baat mani nahin

na marne diya aur na jine diya

koi baat bhi tum ne mani nahin

tere ghamza-o-ishwa-o-naz ki

zamane pe kya hukmarani nahin

payam-e-qaza hai payam-e-qaza

kisi ki jawani jawani nahin

mohabbat ye kahti hai 'masud' se

koi dagh-e-dil si nishani nahin