wo ahd-e-jawani wo KHarabaat ka aalam

vo ahd-e-javānī vo ḳharābāt kā aalam

naġhmāt meñ Duubī huī barsāt kā aalam

allāh-re us zulf ke jāñ-baḳhsh añdhere

jaise ki mahakte hue zulmāt kā aalam

ai ra.asha-e-mastī kā sabab pūchhne vaale

dekhā hai kabhī pahlī mulāqāt kā aalam

nikle the mire saath vo jab bazm-e-azal se

kuchh sub.h ke āsār the kuchh raat kā aalam

yuuñ us kī javānī kā kuchh andāza thā jaise

mai-ḳhāne pe umDī huī barsāt kā aalam

āñkhoñ ke tasādum meñ hikāyāt kī duniyā

hoñToñ ke tasādum meñ ḳharābāt kā aalam

āvāz meñ kaliyoñ ke chaTakne kī latāfat

raftār meñ bahte hue naġhmāt kā aalam

hañstī huī āñkhoñ se savālāt kī bārish

jalte hue hoñToñ meñ javābāt kā aalam

kuchh mujh ko ḳhabar thī na unheñ hosh thā apnā

allāh-re mad-hoshī o jazbāt kā aalam

āñkhoñ meñ shafaq jism meñ mai zulf meñ ThanDak

aalam bhī vo aalam ki ḳharābāt kā aalam

anfās se aatī huī ik narm sī ḳhushbū

simTā huā hoñToñ meñ mudārāt kā aalam

vo chiiz jise zindagī kahte haiñ vo kyā hai

hañste hue shaffāf ḳhayālāt kā aalam

baiThā huuñ 'adam' le ke baḌī der se dil meñ

kahte haiñ jise harf-o-hikāyāt kā aalam

wo ahd-e-jawani wo KHarabaat ka aalam

naghmat mein Dubi hui barsat ka aalam

allah-re us zulf ke jaan-baKHsh andhere

jaise ki mahakte hue zulmat ka aalam

ai rasha-e-masti ka sabab puchhne wale

dekha hai kabhi pahli mulaqat ka aalam

nikle the mere sath wo jab bazm-e-azal se

kuchh subh ke aasar the kuchh raat ka aalam

yun us ki jawani ka kuchh andaza tha jaise

mai-KHane pe umDi hui barsat ka aalam

aankhon ke tasadum mein hikayat ki duniya

honTon ke tasadum mein KHarabaat ka aalam

aawaz mein kaliyon ke chaTakne ki latafat

raftar mein bahte hue naghmat ka aalam

hansti hui aankhon se sawalat ki barish

jalte hue honTon mein jawabaat ka aalam

kuchh mujh ko KHabar thi na unhen hosh tha apna

allah-re mad-hoshi o jazbaat ka aalam

aankhon mein shafaq jism mein mai zulf mein ThanDak

aalam bhi wo aalam ki KHarabaat ka aalam

anfas se aati hui ek narm si KHushbu

simTa hua honTon mein mudaraat ka aalam

wo chiz jise zindagi kahte hain wo kya hai

hanste hue shaffaf KHayalat ka aalam

baiTha hun 'adam' le ke baDi der se dil mein

kahte hain jise harf-o-hikayat ka aalam