wo ajnabi tha ghair tha kis ne kaha na tha

vo ajnabī thā ġhair thā kis ne kahā na thā

dil ko magar yaqīn kisī par huā na thā

ham ko to ehtiyāt-e-ġham-e-dil aziiz thī

kuchh is liye bhī kam-nigahī kā gilā na thā

dast-e-ḳhayāl-e-yār se phūTe shafaq ke rañg

naqsh-e-qadam bhī rañg-e-hinā ke sivā na thā

DhūñDā use bahut ki bulāyā thā jis ne paas

jalva magar kahīñ bhī sadā ke sivā na thā

kuchh is qadar thī garmī-e-bāzār-e-ārzū

dil jo ḳharīdtā thā use dekhtā na thā

kaise kareñge zikr-e-habīb-e-jafā-pasand

jab naam dostoñ meñ bhī lenā ravā na thā

kuchh yuuñ hī zard zard sī 'nāhīd' aaj thī

kuchh oḌhnī kā rañg bhī khiltā huā na thā

wo ajnabi tha ghair tha kis ne kaha na tha

dil ko magar yaqin kisi par hua na tha

hum ko to ehtiyat-e-gham-e-dil aziz thi

kuchh is liye bhi kam-nigahi ka gila na tha

dast-e-KHayal-e-yar se phuTe shafaq ke rang

naqsh-e-qadam bhi rang-e-hina ke siwa na tha

DhunDa use bahut ki bulaya tha jis ne pas

jalwa magar kahin bhi sada ke siwa na tha

kuchh is qadar thi garmi-e-bazar-e-arzu

dil jo KHaridta tha use dekhta na tha

kaise karenge zikr-e-habib-e-jafa-pasand

jab nam doston mein bhi lena rawa na tha

kuchh yun hi zard zard si 'nahid' aaj thi

kuchh oDhni ka rang bhi khilta hua na tha