wo alag chup hai KHud se sharma kar

vo alag chup hai ḳhud se sharmā kar

kyā kiyā maiñ ne haath phailā kar

phal har ik Daal par nahīñ hote

sañg har Daal par na pheñkā kar

taaza rakhne kī koī sūrat soch

sūkhe lab par zabāñ na pherā kar

dasht-e-sūraj meñ kyā milā ham ko

rah gayā rañg apnā sañvlā kar

miT na jaa.e kahīñ vajūd tirā

ḳhud ko fursat meñ chhū ke dekhā kar

aa.inā ho chalā hai sūraj ab

hai yahī vaqt sab ko andhā kar

ek hoñ do kināre dariyā ke

koī aisī sabīl paidā kar

kaise darvāze par qadam rakhkhūñ

koī leTā hai paañv phailā kar

sūrateñ zehn se na miT jaa.eñ

bhūle-bhaTke idhar bhī niklā kar

sarsarī taur par jo baat huī

us ne pūchhā usī ko dohrā kar

Thahre paanī meñ pheñk kar patthar

apne saa.e ko tū na rusvā kar

wo alag chup hai KHud se sharma kar

kya kiya main ne hath phaila kar

phal har ek Dal par nahin hote

sang har Dal par na phenka kar

taza rakhne ki koi surat soch

sukhe lab par zaban na phera kar

dasht-e-suraj mein kya mila hum ko

rah gaya rang apna sanwla kar

miT na jae kahin wajud tera

KHud ko fursat mein chhu ke dekha kar

aaina ho chala hai suraj ab

hai yahi waqt sab ko andha kar

ek hon do kinare dariya ke

koi aisi sabil paida kar

kaise darwaze par qadam rakhkhun

koi leTa hai panw phaila kar

suraten zehn se na miT jaen

bhule-bhaTke idhar bhi nikla kar

sarsari taur par jo baat hui

us ne puchha usi ko dohra kar

Thahre pani mein phenk kar patthar

apne sae ko tu na ruswa kar