wo apne bandon ko pahle to aazmata hai

vo apne bandoñ ko pahle to āzmātā hai

phir un ke husn-e-taġhāful pe muskurātā hai

vahī nikāl ke laatā hai maut ke muñh se

ridā-e-ḳhāk vahī phir hameñ uḌhātā hai

samajh meñ aa nahīñ saktā ye falsafa sab kī

añdherī raat meñ kyā hai jo jagmagātā hai

tavāf us kā hī kartī haiñ mushkileñ har dam

lahū ke aañsū jo māñ-bāp ko rulātā hai

ḳhudā bachātā hai har āfat-o-balā se use

kisī pe kar ke jo ehsān bhuul jaatā hai

hamī se dafn karātā hai daanā daanā vo

usī ko phir se hamāre liye ugātā hai

vo ik lakīr jo donoñ ke darmiyāñ meñ hai

guzartā vaqt use har ghaḌī miTātā hai

hazār koshisheñ kar lo natīja kuchh bhī nahīñ

vahī sañbhaltā hai 'ātif' jo choT khātā hai

wo apne bandon ko pahle to aazmata hai

phir un ke husn-e-taghaful pe muskuraata hai

wahi nikal ke lata hai maut ke munh se

rida-e-KHak wahi phir hamein uDhata hai

samajh mein aa nahin sakta ye falsafa sab ki

andheri raat mein kya hai jo jagmagata hai

tawaf us ka hi karti hain mushkilen har dam

lahu ke aansu jo man-bap ko rulata hai

KHuda bachata hai har aafat-o-bala se use

kisi pe kar ke jo ehsan bhul jata hai

hami se dafn karaata hai dana dana wo

usi ko phir se hamare liye ugata hai

wo ek lakir jo donon ke darmiyan mein hai

guzarta waqt use har ghaDi miTata hai

hazar koshishen kar lo natija kuchh bhi nahin

wahi sanbhalta hai 'atif' jo choT khata hai