وہ اپنے بندوں کو پہلے تو آزماتا ہے

وہ اپنے بندوں کو پہلے تو آزماتا ہے

پھر ان کے حسن تغافل پہ مسکراتا ہے

وہی نکال کے لاتا ہے موت کے منہ سے

ردائے خاک وہی پھر ہمیں اڑھاتا ہے

سمجھ میں آ نہیں سکتا یہ فلسفہ سب کی

اندھیری رات میں کیا ہے جو جگمگاتا ہے

طواف اس کا ہی کرتی ہیں مشکلیں ہر دم

لہو کے آنسو جو ماں باپ کو رلاتا ہے

خدا بچاتا ہے ہر آفت و بلا سے اسے

کسی پہ کر کے جو احسان بھول جاتا ہے

ہمی سے دفن کراتا ہے دانا دانا وہ

اسی کو پھر سے ہمارے لئے اگاتا ہے

وہ اک لکیر جو دونوں کے درمیاں میں ہے

گزرتا وقت اسے ہر گھڑی مٹاتا ہے

ہزار کوششیں کر لو نتیجہ کچھ بھی نہیں

وہی سنبھلتا ہے عاطفؔ جو چوٹ کھاتا ہے