wo aur bazm hai jis mein charagh jalte hain

vo aur bazm hai jis meñ charāġh jalte haiñ

yahāñ to apne hī dil aur dimāġh jalte haiñ

tum apnī bazm-e-farāġhat se duur dekho to

ḳhud apnī aag meñ yaañ kitne baaġh jalte haiñ

nikal ke dekho haram se bahār duniyā kī

ki but-kade meñ hazāroñ charāġh jalte haiñ

ye faiz-e-garmī-e-dil hai ki josh-e-bāda-e-tund

hamāre haath meñ aa kar ayāġh jalte haiñ

ajiib sard fazā hai savād-e-ālam kī

ḳhushā vo bazm jahāñ dil ke daaġh jalte haiñ

kahāñ farāġh ki dil meñ haiñ valvale jis ke

abhī to valvala-hā-e-farāġh jalte haiñ

wo aur bazm hai jis mein charagh jalte hain

yahan to apne hi dil aur dimagh jalte hain

tum apni bazm-e-faraghat se dur dekho to

KHud apni aag mein yan kitne bagh jalte hain

nikal ke dekho haram se bahaar duniya ki

ki but-kade mein hazaron charagh jalte hain

ye faiz-e-garmi-e-dil hai ki josh-e-baada-e-tund

hamare hath mein aa kar ayagh jalte hain

ajib sard faza hai sawad-e-alam ki

KHusha wo bazm jahan dil ke dagh jalte hain

kahan faragh ki dil mein hain walwale jis ke

abhi to walwala-ha-e-faragh jalte hain