wo aur honge jo wahm-o-guman ke sath chale

vo aur hoñge jo vahm-o-gumāñ ke saath chale

ham apnī raah pe azm-e-javāñ ke saath chale

talāsh-e-yār meñ ham har maqām se guzre

kabhī zamīn kabhī āsmāñ ke saath chale

na jaane kitnī hī sadiyoñ ke fāsle haiñ abhī

huī hai umr zamān-o-makāñ ke saath chale

kabhī to pā.eñge ham bhī hayāt kī manzil

isī ḳhayāl se umr-e-ravāñ ke saath chale

tamām raat kisī ajnabī kā saath rahā

sahar huī to dil-e-bad-gumāñ ke saath chale

jo phuul ban ke mahakte the rahguzāroñ meñ

ġhubār ban ke tire kārvāñ ke saath chale

vo husn-o-ishq ke qisse haiñ jin se vābasta

unhī kā zikr mirī dāstāñ ke saath chale

junūñ ke dosh pe rakh kar charāġh-e-hastī ham

qazā ko DhūñDne mauj-e-ravāñ ke saath chale

usī ko kahte haiñ shāyad nasīb kī gardish

bahār aa.e to sho.ala ḳhizāñ ke saath chale

wo aur honge jo wahm-o-guman ke sath chale

hum apni rah pe azm-e-jawan ke sath chale

talash-e-yar mein hum har maqam se guzre

kabhi zamin kabhi aasman ke sath chale

na jaane kitni hi sadiyon ke fasle hain abhi

hui hai umr zaman-o-makan ke sath chale

kabhi to paenge hum bhi hayat ki manzil

isi KHayal se umr-e-rawan ke sath chale

tamam raat kisi ajnabi ka sath raha

sahar hui to dil-e-bad-guman ke sath chale

jo phul ban ke mahakte the rahguzaron mein

ghubar ban ke tere karwan ke sath chale

wo husn-o-ishq ke qisse hain jin se wabasta

unhi ka zikr meri dastan ke sath chale

junun ke dosh pe rakh kar charagh-e-hasti hum

qaza ko DhunDne mauj-e-rawan ke sath chale

usi ko kahte hain shayad nasib ki gardish

bahaar aae to shoala KHizan ke sath chale