wo aur log the jo raste badalte rahe

vo aur log the jo rāste badalte rahe

safar hai shart so ham niiñd meñ bhī chalte rahe

pighal rahā thā yugoñ se vajūd kā laavā

ḳhayāl-o-ḳhvāb mire pattharoñ meñ Dhalte rahe

unheñ qubūl mirī rahbarī na thī lekin

muḳhālifīn mire saath saath chalte rahe

jinheñ nasīb huā un ko baḳhsh dī raunaq

maiñ jin ke haath na aayā vo haath malte rahe

agarche zauq-e-safar meñ kamī nahīñ aa.ī

qadam qadam pe magar zāviye badalte rahe

ubhar jo aa.e sar-e-shām ātishīñ lamhe

safar meñ barf-badan der tak pighalte rahe

wo aur log the jo raste badalte rahe

safar hai shart so hum nind mein bhi chalte rahe

pighal raha tha yugon se wajud ka lawa

KHayal-o-KHwab mere pattharon mein Dhalte rahe

unhen qubul meri rahbari na thi lekin

muKHalifin mere sath sath chalte rahe

jinhen nasib hua un ko baKHsh di raunaq

main jin ke hath na aaya wo hath malte rahe

agarche zauq-e-safar mein kami nahin aai

qadam qadam pe magar zawiye badalte rahe

ubhar jo aae sar-e-sham aatishin lamhe

safar mein barf-badan der tak pighalte rahe