wo ba-wafa nahin na sahi bewafa to hai

vo bā-vafā nahīñ na sahī bevafā to hai

duniyā-e-husn-o-ishq meñ ik rābta to hai

ab kyā kareñ ki ye bhī gavārā nahīñ unheñ

ādāb-e-ġham meñ vaise tabassum ravā to hai

ham ko na kyoñ aziiz hoñ duniyā ke pech-o-ḳham

zulfoñ se terī duur kā ik vāsta to hai

tū hī batā kahāñ hai tirī be-ruḳhī kā zikr

tū ne bhī qissa-e-ġham-e-ulfat sunā to hai

un kī nazar se ho ki zamāne kī chaal se

duniyā-e-dil meñ hashr hamārī bapā to hai

kyā ye bhī tere zauq-e-jafā ko hai nāgavār

apnī vafā ko maiñ ne vafā haañ kahā to hai

maanā kabhī jafā kā na shikva kiyā 'shafīq'

un kī ināyatoñ se tumheñ ab gila to hai

wo ba-wafa nahin na sahi bewafa to hai

duniya-e-husn-o-ishq mein ek rabta to hai

ab kya karen ki ye bhi gawara nahin unhen

aadab-e-gham mein waise tabassum rawa to hai

hum ko na kyon aziz hon duniya ke pech-o-KHam

zulfon se teri dur ka ek wasta to hai

tu hi bata kahan hai teri be-ruKHi ka zikr

tu ne bhi qissa-e-gham-e-ulfat suna to hai

un ki nazar se ho ki zamane ki chaal se

duniya-e-dil mein hashr hamari bapa to hai

kya ye bhi tere zauq-e-jafa ko hai nagawar

apni wafa ko main ne wafa han kaha to hai

mana kabhi jafa ka na shikwa kiya 'shafiq'

un ki inayaton se tumhein ab gila to hai