wo baat kare bhi to dil-azar kare hai

vo baat kare bhī to dil-āzār kare hai

inkār kare hai na to iqrār kare hai

vo phir na.e andāz se ik vaar kare hai

phir tīr-e-nazar dil ko mire paar kare hai

andāz-e-nazar us kā zamāne se judā hai

dil muft meñ lene se bhī inkār kare hai

jo ho na sakā barq-e-tapāñ-ḳhez se zālim

vo kaam tirī garmī-e-guftār kare hai

maiñ jaag ke soyā hī thā āḳhir shab-e-furqat

kyoñ va.ade kī aahaT mujhe bedār kare hai

phir kis ne sadā haqq-o-sadāqat kī sunā.ī

ab yaad kise phir rasan-o-dār kare hai

'āzād' har ik gaam pe vo ġhamza-e-ġhammāz

zarroñ ko sitāre dam-e-raftār kare hai

wo baat kare bhi to dil-azar kare hai

inkar kare hai na to iqrar kare hai

wo phir nae andaz se ek war kare hai

phir tir-e-nazar dil ko mere par kare hai

andaz-e-nazar us ka zamane se juda hai

dil muft mein lene se bhi inkar kare hai

jo ho na saka barq-e-tapan-KHez se zalim

wo kaam teri garmi-e-guftar kare hai

main jag ke soya hi tha aaKHir shab-e-furqat

kyon wade ki aahaT mujhe bedar kare hai

phir kis ne sada haqq-o-sadaqat ki sunai

ab yaad kise phir rasan-o-dar kare hai

'azad' har ek gam pe wo ghamza-e-ghammaz

zarron ko sitare dam-e-raftar kare hai