wo bahr-o-bar mein nahin aur na aasman mein hai

vo bahr-o-bar meñ nahīñ aur na āsmāñ meñ hai

jo rāz-e-zīst mire shauq-e-be-karāñ meñ hai

mujhe qarār ba-juz shauq-e-be-qarār nahīñ

sukūn-e-zīst mujhe shoḳhī-e-butāñ meñ hai

mujhe qubūl nahīñ aisā rāz-e-sar-basta

jo chashm-e-aql se poshīda lā-makāñ meñ hai

mirī hayāt faqat justujū-e-paiham hai

mirā maqām sitāroñ ke kārvāñ meñ hai

maiñ āsmāñ meñ sitāroñ kī sair kartā huuñ

ye kyā surūr tire sañg-e-āstāñ meñ hai

mire vajūd meñ pinhāñ hai gauhar-e-yaktā

mirā vajūd nihāñ bahr-e-be-karāñ meñ hai

chaman meñ jabki nasheman banā chukā huuñ maiñ

ajab tarah kī chamak chashm-e-āsmāñ meñ hai

mire kalām se aayā hai barg-e-gul pe nikhār

mire nafas kī mahak saare gulsitāñ meñ hai

vo lutf-e-zīst jo hai tund-o-tez tūfāñ meñ

vo shāḳh-e-gul pe nahīñ aur na āshiyāñ meñ hai

vo soz-o-sāz-e-haqīqat se āshnā hogī

vo zindagī jo hama-vaqt imtihāñ meñ hai

har ek lahza hai ik taaza valvala darkār

ajab tarah kā maza bahr-e-be-karāñ meñ hai

vo merī quvvat-e-īmāñ kī ik 'alāmat hai

jo shor-e-hashr bapā bazm-e-dushmanāñ meñ hai

wo bahr-o-bar mein nahin aur na aasman mein hai

jo raaz-e-zist mere shauq-e-be-karan mein hai

mujhe qarar ba-juz shauq-e-be-qarar nahin

sukun-e-zist mujhe shoKHi-e-butan mein hai

mujhe qubul nahin aisa raaz-e-sar-basta

jo chashm-e-aql se poshida la-makan mein hai

meri hayat faqat justuju-e-paiham hai

mera maqam sitaron ke karwan mein hai

main aasman mein sitaron ki sair karta hun

ye kya surur tere sang-e-astan mein hai

mere wajud mein pinhan hai gauhar-e-yakta

mera wajud nihan bahr-e-be-karan mein hai

chaman mein jabki nasheman bana chuka hun main

ajab tarah ki chamak chashm-e-asman mein hai

mere kalam se aaya hai barg-e-gul pe nikhaar

mere nafas ki mahak sare gulsitan mein hai

wo lutf-e-zist jo hai tund-o-tez tufan mein

wo shaKH-e-gul pe nahin aur na aashiyan mein hai

wo soz-o-saz-e-haqiqat se aashna hogi

wo zindagi jo hama-waqt imtihan mein hai

har ek lahza hai ek taza walwala darkar

ajab tarah ka maza bahr-e-be-karan mein hai

wo meri quwwat-e-iman ki ek 'alamat hai

jo shor-e-hashr bapa bazm-e-dushmanan mein hai