wo bahut be-qarar hai shayad

vo bahut be-qarār hai shāyad

us ko bhī intizār hai shāyad

nafrateñ sar se paañv tak dekheñ

dil meñ thoḌā sā pyaar hai shāyad

kar ke tai marhale udaas thā vo

jeb meñ us kī haar hai shāyad

zindagī āḳhirī Thikāne par

qābil-e-e'tibār hai shāyad

ġham bhī phal-phūltā hai aa.e din

shajar-e-sāya-dār hai shāyad

mere rone pe koī baat na kī

aaj vo sogvār hai shāyad

guftugū meñ na mujh se jiit sakā

is liye sharmsār hai shāyad

jis ko dekhūñ vo girtā paḌtā hai

har taraf intishār hai shāyad

kaj-kulāhī tumhārī 'īraj' jī

bā.is-e-iftiḳhār hai shāyad

wo bahut be-qarar hai shayad

us ko bhi intizar hai shayad

nafraten sar se panw tak dekhen

dil mein thoDa sa pyar hai shayad

kar ke tai marhale udas tha wo

jeb mein us ki haar hai shayad

zindagi aaKHiri Thikane par

qabil-e-e'tibar hai shayad

gham bhi phal-phulta hai aae din

shajar-e-saya-dar hai shayad

mere rone pe koi baat na ki

aaj wo sogwar hai shayad

guftugu mein na mujh se jit saka

is liye sharmsar hai shayad

jis ko dekhun wo girta paDta hai

har taraf intishaar hai shayad

kaj-kulahi tumhaari 'iraj' ji

bais-e-iftiKHar hai shayad