وہ بن سنور کے سر شام جب نکلتے ہیں

وہ بن سنور کے سر شام جب نکلتے ہیں

نظر نظر میں ہزاروں چراغ جلتے ہیں

وہ اپنی آگ میں روز ازل سے جلتے ہیں

یہ فیصلے ہیں مقدر کے کب بدلتے ہیں

تم اپنے گوشۂ داماں کو پھر قریب کرو

ہمارے اشک رواں موتیوں میں ڈھلتے ہیں

وہی تو لائق عظمت ہیں بزم ہستی میں

جو لوگ گرتے ہیں گر گر کے پھر سنبھلتے ہیں

وہ ہم سے ترک تعلق بھی کر چکے لیکن

نہ جانے آج بھی کیوں لوگ ہم سے جلتے ہیں

پتا بہار کی آمد کا ایسے چلتا ہے

قفس کی آ کے وہ جب تیلیاں بدلتے ہیں

غم فراق ہو حیرتؔ کہ گردش دوراں

نہ جانے کب سے مرے ساتھ ساتھ چلتے ہیں