wo ban-sanwar ke sar-e-sham jab nikalte hain

vo ban-sañvar ke sar-e-shām jab nikalte haiñ

nazar nazar meñ hazāroñ charāġh jalte haiñ

vo apnī aag meñ roz-e-azal se jalte haiñ

ye faisle haiñ muqaddar ke kab badalte haiñ

tum apne gosha-e-dāmāñ ko phir qarīb karo

hamāre ashk-e-ravāñ motiyoñ meñ Dhalte haiñ

vahī to lā.eq-e-azmat haiñ bazm-e-hastī meñ

jo log girte haiñ gir gir ke phir sañbhalte haiñ

vo ham se tark-e-ta.alluq bhī kar chuke lekin

na jaane aaj bhī kyoñ log ham se jalte haiñ

patā bahār kī aamad kā aise chaltā hai

qafas kī aa ke vo jab tīliyāñ badalte haiñ

ġham-e-firāq ho 'hairat' ki gardish-e-daurāñ

na jaane kab se mire saath saath chalte haiñ

wo ban-sanwar ke sar-e-sham jab nikalte hain

nazar nazar mein hazaron charagh jalte hain

wo apni aag mein roz-e-azal se jalte hain

ye faisle hain muqaddar ke kab badalte hain

tum apne gosha-e-daman ko phir qarib karo

hamare ashk-e-rawan motiyon mein Dhalte hain

wahi to laeq-e-azmat hain bazm-e-hasti mein

jo log girte hain gir gir ke phir sanbhalte hain

wo hum se tark-e-talluq bhi kar chuke lekin

na jaane aaj bhi kyon log hum se jalte hain

pata bahaar ki aamad ka aise chalta hai

qafas ki aa ke wo jab tiliyan badalte hain

gham-e-firaq ho 'hairat' ki gardish-e-dauran

na jaane kab se mere sath sath chalte hain