wo bastiyan wo baam wo dar kitni dur hain

vo bastiyāñ vo baam vo dar kitnī duur haiñ

mahtāb tere chāñd-nagar kitnī duur haiñ

vo ḳhvāb jo ġhubār-e-gumāñ meñ nazar na aa.e

vo ḳhvāb tujh se dīda-e-tar kitnī duur haiñ

bām-e-ḳhayāl-e-yār se utre to ye khulā

ham se hamāre shām-o-sahar kitnī duur haiñ

ai āsmān in ko jahāñ honā chāhiye

us ḳhaak se ye ḳhāk-basar kitnī duur haiñ

baiThe biThā.e dil ke safar par chale to aa.e

lekin vo mehrbān-e-safar kitnī duur haiñ

ye bhī ġhazal tamām huī shaam ho chukī

afsūn-e-shā.irī ke hunar kitnī duur haiñ

wo bastiyan wo baam wo dar kitni dur hain

mahtab tere chand-nagar kitni dur hain

wo KHwab jo ghubar-e-guman mein nazar na aae

wo KHwab tujh se dida-e-tar kitni dur hain

baam-e-KHayal-e-yar se utre to ye khula

hum se hamare sham-o-sahar kitni dur hain

ai aasman in ko jahan hona chahiye

us KHak se ye KHak-basar kitni dur hain

baiThe biThae dil ke safar par chale to aae

lekin wo mehrban-e-safar kitni dur hain

ye bhi ghazal tamam hui sham ho chuki

afsun-e-shairi ke hunar kitni dur hain