wo be-dar raaton mein kam-KHwab aalam

vo be-dār rātoñ meñ kam-ḳhvāb aalam

kisī ke tasavvur meñ kho.e hue ham

ḳhayāloñ pa chhāyā huā nūr-paikar

shab-e-mah se raushan ziyāda shab-e-ġham

vahī rū-e-zebā vahī zulf barham

haiñ asbāb barham-zan-e-har-do-ālam

ḳhizāoñ kā aalam na pūchho ki yaañ to

bahāreñ bhī aatī haiñ bā-chashm-e-pur-nam

nigāhoñ meñ hasrat hai vāmāndagi hai

kabhī vo bhī din the ki ham tum the tum ham

nahīñ hai jo mujh ko koī fikr-e-duniyā

bahut haiñ ki jin ko hai is baat kā ġham

ḳhushī aur ġham kā muraqqā hai duniyā

guloñ kī hañsī par girā ashk-e-shabnam

musāvāt jamhūriyat meñ kahāñ hai

kahīñ hai ināyat ziyāda kahīñ kam

lab-o-ruḳh kī bāteñ tafannun haiñ 'rizvāñ'

kiyā hai zamāne kī gardish ne be-dam

wo be-dar raaton mein kam-KHwab aalam

kisi ke tasawwur mein khoe hue hum

KHayalon pa chhaya hua nur-paikar

shab-e-mah se raushan ziyaada shab-e-gham

wahi ru-e-zeba wahi zulf barham

hain asbab barham-zan-e-har-do-alam

KHizaon ka aalam na puchho ki yan to

bahaaren bhi aati hain ba-chashm-e-pur-nam

nigahon mein hasrat hai wamandagi hai

kabhi wo bhi din the ki hum tum the tum hum

nahin hai jo mujh ko koi fikr-e-duniya

bahut hain ki jin ko hai is baat ka gham

KHushi aur gham ka muraqqa hai duniya

gulon ki hansi par gira ashk-e-shabnam

musawat jamhuriyat mein kahan hai

kahin hai inayat ziyaada kahin kam

lab-o-ruKH ki baaten tafannun hain 'rizwan'

kiya hai zamane ki gardish ne be-dam