wo be-KHud-e-shabab wo simin-badan kahan

vo be-ḳhūd-e-shabāb vo sīmīñ-badan kahāñ

maiñ ġham-nasīb kushta-e-ranj-o-mehan kahāñ

dil meñ kisī kī yaad ne phir lī haiñ chuTkiyāñ

āñkhoñ meñ chhup gayā hai vo ġhuncha-dahan kahāñ

duniyā-e-rang-o-bū meñ usī kā thā ehtimām

vo gul-badan nahīñ to bahār-e-chaman kahāñ

ārām aa chukā hai dil-e-be-qarār ko

aglī sī vo ḳhalish vo kasak vo chubhan kahāñ

fikr-e-ma.āsh ne hameñ sab kuchh bhulā diyā

ab vo bisāt-e-aish vo bazm-e-suḳhan kahāñ

marte haiñ ab bhī bāda-o-shāhid ke naam par

ahl-e-vatan meñ jazba-e-hubb-e-vatan kahāñ

saarā jahān apnā vatan ab to hai 'bahār'

kyoñ mujh se pūchhiye ki hai merā vatan kahāñ

wo be-KHud-e-shabab wo simin-badan kahan

main gham-nasib kushta-e-ranj-o-mehan kahan

dil mein kisi ki yaad ne phir li hain chuTkiyan

aankhon mein chhup gaya hai wo ghuncha-dahan kahan

duniya-e-rang-o-bu mein usi ka tha ehtimam

wo gul-badan nahin to bahaar-e-chaman kahan

aaram aa chuka hai dil-e-be-qarar ko

agli si wo KHalish wo kasak wo chubhan kahan

fikr-e-maash ne hamein sab kuchh bhula diya

ab wo bisat-e-aish wo bazm-e-suKHan kahan

marte hain ab bhi baada-o-shahid ke nam par

ahl-e-watan mein jazba-e-hubb-e-watan kahan

sara jahan apna watan ab to hai 'bahaar'

kyon mujh se puchhiye ki hai mera watan kahan