wo bewafa hi sahi usko bewafa na kaho

vo bevafā hī sahī us ko bevafā na kaho

adab kī had meñ raho husn ko burā na kaho

sharāb-e-ishq kī azmat se jo kare inkār

vo pārsā bhī agar ho to pārsā na kaho

paḌā hai kaam usī ḳhud-parast kāfir se

jise ye zid hai kisī aur ko ḳhudā na kaho

mirā ḳhulūs-e-mohabbat hai qadr ke qābil

zabāñ pe zikr-e-vafā hai use gilā na kaho

ye kyā kahā ki duā hai asar se begāna

taḌap na dil kī ho jis meñ use duā na kaho

ye aur kuchh nahīñ fitrat kī bad-mazāqī hai

baġhair baada ghaTā ko kabhī ghaTā na kaho

taḌap taḌap ke guzāro shab-e-firāq apnī

ye nāz-e-husn hai 'shā.ir' ise jafā na kaho

wo bewafa hi sahi us ko bewafa na kaho

adab ki had mein raho husn ko bura na kaho

sharab-e-ishq ki azmat se jo kare inkar

wo parsa bhi agar ho to parsa na kaho

paDa hai kaam usi KHud-parast kafir se

jise ye zid hai kisi aur ko KHuda na kaho

mera KHulus-e-mohabbat hai qadr ke qabil

zaban pe zikr-e-wafa hai use gila na kaho

ye kya kaha ki dua hai asar se begana

taDap na dil ki ho jis mein use dua na kaho

ye aur kuchh nahin fitrat ki bad-mazaqi hai

baghair baada ghaTa ko kabhi ghaTa na kaho

taDap taDap ke guzaro shab-e-firaq apni

ye naz-e-husn hai 'shair' ise jafa na kaho