وہ بے وفا کوئی دم اور جو ٹھہر جاتا

وہ بے وفا کوئی دم اور جو ٹھہر جاتا

رہ طلب میں یہ دل یوں نہ در بدر جاتا

تری گلی میں فسانے بکھیرنے کے لئے

یہ لازمی تھا کہ ہم سا ہی بے خطر جاتا

تجھ اجنبی کا ہو کیا غم کہ اس اندھیرے میں

میں اپنے آپ کو خود دیکھتا تو ڈر جاتا

تمہاری بندش آداب سے نظر جاگی

میں بے خبر تو یوں ہی راہ سے گزر جاتا

مجھی میں ہو نہ کسی آنچ کی کمی ورنہ

کوئی سخن تو تری روح تک اتر جاتا

کوئی نگاہ تو ہوتی سکوں شناس کبھی

کوئی نفس تو کسی موڑ پر ٹھہر جاتا

وہ بوئے گل ہے تو ہم موجۂ صبا انجمؔ

وہ ہم سے بچ کے چلا تھا مگر کدھر جاتا