wo bewafa koi dam aur jo Thahar jata

vo bevafā koī dam aur jo Thahar jaatā

rah-e-talab meñ ye dil yuuñ na dar-ba-dar jaatā

tirī galī meñ fasāne bikherne ke liye

ye lāzmī thā ki ham sā hī be-ḳhatar jaatā

tujh ajnabī kā ho kyā ġham ki is añdhere meñ

maiñ apne-āp ko ḳhud dekhtā to Dar jaatā

tumhārī bandish-e-ādāb se nazar jaagī

maiñ be-ḳhabar to yūñhī raah se guzar jaatā

mujhī meñ ho na kisī aañch kī kamī varna

koī suḳhan to tirī ruuh tak utar jaatā

koī nigāh to hotī sukūñ-shanās kabhī

koī nafas to kisī moḌ par Thahar jaatā

vo bū-e-gul hai to ham mauja-e-sabā 'anjum'

vo ham se bach ke chalā thā magar kidhar jaatā

wo bewafa koi dam aur jo Thahar jata

rah-e-talab mein ye dil yun na dar-ba-dar jata

teri gali mein fasane bikherne ke liye

ye lazmi tha ki hum sa hi be-KHatar jata

tujh ajnabi ka ho kya gham ki is andhere mein

main apne-ap ko KHud dekhta to Dar jata

tumhaari bandish-e-adab se nazar jagi

main be-KHabar to yunhi rah se guzar jata

mujhi mein ho na kisi aanch ki kami warna

koi suKHan to teri ruh tak utar jata

koi nigah to hoti sukun-shanas kabhi

koi nafas to kisi moD par Thahar jata

wo bu-e-gul hai to hum mauja-e-saba 'anjum'

wo hum se bach ke chala tha magar kidhar jata