وہ بھی کیا عالم تھا جب اپنا کوئی عالم نہ تھا

وہ بھی کیا عالم تھا جب اپنا کوئی عالم نہ تھا

عیش سے واقف نہ تھا دل آشنائے غم نہ تھا

جس نے دیکھا ہی نہیں وہ تجھ کو کیوں کر جانتا

دیکھنے پر بھی تو کوئی حسن کا محرم نہ تھا

قہر تھا شکوہ ستم کا ورنہ اس سے پیشتر

ان نگاہوں کی پشیمانی کا یہ عالم نہ تھا

تھا مذاق درد فرخؔ سعیٔ درماں سے بلند

زخم دل میرا کبھی شرمندہ مرہم نہ تھا

جب قفس میں آئے تھے ہم وہ بھی کیا ہنگام تھا

باغ سے تا خانۂ صیاد اک کہرام تھا

کس قیامت کا دیا ان کی نگاہوں نے فریب

جس کو ہم آغاز سمجھے تھے وہی انجام تھا

دیکھنے آئے تھے ہم ناز و نیاز حسن و عشق

ورنہ مرنا اور جینا یہ بھی کوئی کام تھا

یہ نیا دستور دیکھا حسن کی سرکار میں

جو سزا وار کرم تھا مورد الزام تھا

ایک دور بے خودی میں سب حقیقت کھل گئی

ہم وہاں پہونچے جہاں اللہ کا بس نام تھا

وائے غفلت ہم رہے انجام سے ناآشنا

زندگی کے ہر نفس میں موت کا پیغام تھا

حسن کے پاس ادب سے ہم رہے پابند ضبط

ورنہ اک دل کا ہلا دینا بھی کوئی کام تھا

ہو گیا دم بھر میں فرخؔ کچھ سے کچھ رنگ چمن

خندۂ گل میں خدا معلوم کیا پیغام تھا