wo bhi kya aalam tha jab apna koi aalam na tha

vo bhī kyā aalam thā jab apnā koī aalam na thā

aish se vāqif na thā dil āshnā-e-ġham na thā

jis ne dekhā hī nahīñ vo tujh ko kyūñkar jāntā

dekhne par bhī to koī husn kā mahram na thā

qahr thā shikva sitam kā varna is se peshtar

in nigāhoñ kī pashemānī kā ye aalam na thā

thā mazāq-e-dard 'farruḳh' sa.ī-e-darmāñ se buland

zaḳhm-e-dil merā kabhī sharminda-e-marham na thā

jab qafas meñ aa.e the ham vo bhī kyā hangām thā

baaġh se tā-ḳhāna-e-sayyād ik kohrām thā

kis qayāmat kā diyā un kī nigāhoñ ne fareb

jis ko ham āġhāz samjhe the vahī anjām thā

dekhne aa.e the ham nāz-o-niyāz-e-husn-o-ishq

varna marnā aur jiinā ye bhī koī kaam thā

ye nayā dastūr dekhā husn kī sarkār meñ

jo sazā-vār-e-karam thā morid-e-ilzām thā

ek daur-e-be-ḳhudī meñ sab haqīqat khul ga.ī

ham vahāñ pahoñche jahāñ allāh kā bas naam thā

vā.e-ġhaflat ham rahe anjām se nā-āshnā

zindagī ke har-nafas meñ maut kā paiġhām thā

husn ke pās-e-adab se ham rahe pāband-e-zabt

varna ik dil kā hilā denā bhī koī kaam thā

ho gayā dam bhar meñ 'farruḳh' kuchh se kuchh rang-e-chaman

ḳhanda-e-gul meñ ḳhudā ma.alūm kyā paiġhām thā

wo bhi kya aalam tha jab apna koi aalam na tha

aish se waqif na tha dil aashna-e-gham na tha

jis ne dekha hi nahin wo tujh ko kyunkar jaanta

dekhne par bhi to koi husn ka mahram na tha

qahr tha shikwa sitam ka warna is se peshtar

in nigahon ki pashemani ka ye aalam na tha

tha mazaq-e-dard 'farruKH' sai-e-darman se buland

zaKHm-e-dil mera kabhi sharminda-e-marham na tha

jab qafas mein aae the hum wo bhi kya hangam tha

bagh se ta-KHana-e-sayyaad ek kohram tha

kis qayamat ka diya un ki nigahon ne fareb

jis ko hum aaghaz samjhe the wahi anjam tha

dekhne aae the hum naz-o-niyaz-e-husn-o-ishq

warna marna aur jina ye bhi koi kaam tha

ye naya dastur dekha husn ki sarkar mein

jo saza-war-e-karam tha morid-e-ilzam tha

ek daur-e-be-KHudi mein sab haqiqat khul gai

hum wahan pahonche jahan allah ka bas nam tha

wae-ghaflat hum rahe anjam se na-ashna

zindagi ke har-nafas mein maut ka paigham tha

husn ke pas-e-adab se hum rahe paband-e-zabt

warna ek dil ka hila dena bhi koi kaam tha

ho gaya dam bhar mein 'farruKH' kuchh se kuchh rang-e-chaman

KHanda-e-gul mein KHuda malum kya paigham tha