wo bhi kya din the juda hote na the ek dam kahin

vo bhī kyā din the judā hote na the ik dam kahīñ

gardish-e-aflāk se ab tum kahīñ aur ham kahīñ

tham raheñ yā-rab na apne dīda-e-pur-nam kahīñ

kam na ho duniyā se ab ye chashma-e-zamzam kahīñ

ġham na khā ai dil ki duniyā kā yahī qānūn hai

naġhma-e-shādī kahīñ hai nāla-e-mātam kahīñ

ab ye aalam hai ki ik aalam kā jī qurbān hai

o but-e-kāfir na dekhā terā sā aalam kahīñ

go pareshāñ kar de merī sarsar-e-āh ik jahāñ

ho na vo zulf-e-mo.ambar darham-o-barham kahīñ

zālim-o-be-rahm duniyā meñ nahīñ gar aap sā

sābir-o-shākir ziyāda mujh se hogā kam kahīñ

ġhuncha saañ ḳhūn-e-jigar pī pī ke rahte haiñ mudām

shakl-e-gul ho jaa.e TukḌe dil jo ho ḳhurram kahīñ

umr ke mānind har dam ham se ram hai yaar ko

chaukḌī bhūle hiran kar dekh le ye ram kahīñ

us kī pistāñ par jo pherā haath vo kahne lagā

mahramoñ par Dālte haiñ haath nā-mahram kahīñ

is zamīñ meñ aur bhī 'daula' sunāo ik ġhazal

aap ke se sher kā dekhā nahīñ aalam kahīñ

wo bhi kya din the juda hote na the ek dam kahin

gardish-e-aflak se ab tum kahin aur hum kahin

tham rahen ya-rab na apne dida-e-pur-nam kahin

kam na ho duniya se ab ye chashma-e-zamzam kahin

gham na kha ai dil ki duniya ka yahi qanun hai

naghma-e-shadi kahin hai nala-e-matam kahin

ab ye aalam hai ki ek aalam ka ji qurban hai

o but-e-kafir na dekha tera sa aalam kahin

go pareshan kar de meri sarsar-e-ah ek jahan

ho na wo zulf-e-moambar darham-o-barham kahin

zalim-o-be-rahm duniya mein nahin gar aap sa

sabir-o-shakir ziyaada mujh se hoga kam kahin

ghuncha san KHun-e-jigar pi pi ke rahte hain mudam

shakl-e-gul ho jae TukDe dil jo ho KHurram kahin

umr ke manind har dam hum se ram hai yar ko

chaukDi bhule hiran kar dekh le ye ram kahin

us ki pistan par jo phera hath wo kahne laga

mahramon par Dalte hain hath na-mahram kahin

is zamin mein aur bhi 'daula' sunao ek ghazal

aap ke se sher ka dekha nahin aalam kahin