wo bhi kya din the ki jab chah na thi pyar na tha

vo bhī kyā din the ki jab chaah na thī pyaar na thā

hijr kā ranj na thā ishq kā āzār na thā

be-ḳhudī terā burā ho mujhe jab hosh aaya

dil na thā siine meñ pahlū meñ vo ayyār na thā

de ke dil un ko paḌī jaan ġhazab meñ merī

vasl ko kahiye to kahte haiñ ki iqrār na thā

kyoñ lahad ko mire Thukrā ke miTāyā us ne

merī jānib se mukaddar jo sitamgār na thā

lab pe fariyād rahī ashk rahe āñkhoñ meñ

kab tirā dhyān mujhe ai but-e-ayyār na thā

ye bhī din haiñ ki hasīnoñ pe miTā jaatā huuñ

vo bhī din the ki mujhe ishq kā āzār na thā

hashr meñ fazl se apne mujhe haq ne baḳhshā

go ki duniyā meñ koī mujh sā siyahkār na thā

nigah-e-mast ne terī ye dikhā.ī tāsīr

sab the badmast koī raat ko hushiyār na thā

ai junūñ mausam-e-gul meñ tire hāthoñ he he

dāman-o-jeb meñ dekhā to koī taar na thā

pīTtā thā kabhī sar ko to kabhī siine ko

shab-e-tanhā.ī meñ ai shoḳh maiñ bekār na thā

kūcha-e-yār se yuuñ shaiḳh-o-barahman nikle

sar pe dastār na thī dosh pe zunnār na thā

kyā mohabbat ne mirī apnī dikhā.ī tāsīr

kis liye bazm meñ shab majma-e-aġhyār na thā

hajv-e-mai karte the kal hazrat-e-vā.iz sar-e-rāh

ḳhairiyat guzrī ki suntā koī mai-ḳhvār na thā

yuuñ to shab bazm meñ har ek gayā aur aaya

ek bad-baḳht maiñ hī thā jise vaañ yaar na thā

jāgtā merā nasība jo shab-e-vasl-e-adū

pāsbāñ ye to tirā dīda-e-bedār na thā

dard-o-andoh-o-ġham-o-ranj-o-alam ai 'nashtar'

ek duniyā thī mirī laash pe vo yaar na thā

wo bhi kya din the ki jab chah na thi pyar na tha

hijr ka ranj na tha ishq ka aazar na tha

be-KHudi tera bura ho mujhe jab hosh aaya

dil na tha sine mein pahlu mein wo ayyar na tha

de ke dil un ko paDi jaan ghazab mein meri

wasl ko kahiye to kahte hain ki iqrar na tha

kyon lahad ko mere Thukra ke miTaya us ne

meri jaanib se mukaddar jo sitamgar na tha

lab pe fariyaad rahi ashk rahe aankhon mein

kab tera dhyan mujhe ai but-e-ayyar na tha

ye bhi din hain ki hasinon pe miTa jata hun

wo bhi din the ki mujhe ishq ka aazar na tha

hashr mein fazl se apne mujhe haq ne baKHsha

go ki duniya mein koi mujh sa siyahkar na tha

nigah-e-mast ne teri ye dikhai tasir

sab the badmast koi raat ko hushiyar na tha

ai junun mausam-e-gul mein tere hathon he he

daman-o-jeb mein dekha to koi tar na tha

piTta tha kabhi sar ko to kabhi sine ko

shab-e-tanhai mein ai shoKH main bekar na tha

kucha-e-yar se yun shaiKH-o-barahman nikle

sar pe dastar na thi dosh pe zunnar na tha

kya mohabbat ne meri apni dikhai tasir

kis liye bazm mein shab majma-e-aghyar na tha

hajw-e-mai karte the kal hazrat-e-waiz sar-e-rah

KHairiyat guzri ki sunta koi mai-KHwar na tha

yun to shab bazm mein har ek gaya aur aaya

ek bad-baKHt main hi tha jise wan yar na tha

jagta mera nasiba jo shab-e-wasl-e-adu

pasban ye to tera dida-e-bedar na tha

dard-o-andoh-o-gham-o-ranj-o-alam ai 'nashtar'

ek duniya thi meri lash pe wo yar na tha