wo bigDe hain ruke baiThe hain jhunjlate hain laDte hain

vo bigḌe haiñ ruke baiThe haiñ jhuñjlāte haiñ laḌte haiñ

kabhī ham joḌte haiñ haath gaahe paañv paḌte haiñ

ga.e haiñ hosh aise gar kahīñ jaane ko uThtā huuñ

to jaatā huuñ idhar ko aur udhar ko paañv paḌte haiñ

hamārā le ke dil kyā ek bosa bhī nahīñ deñge

vo yuuñ dil meñ to raazī haiñ magar zāhir jhagaḌte haiñ

jo tum ko ik shikāyat hai to mujh ko laakh shikve haiñ

lo aao mil bhī jaao ye kahīñ qisse nabaḌte haiñ

udhar vo aur ā.īna hai aur kākul banānā hai

idhar vahm aur ḳhāmoshī hai aur dil meñ bigaḌte haiñ

yahāñ to sab hamārī jaañ ko nāseh ban ke aate haiñ

vahāñ jaate hue dil chhuTte haiñ dam ukhaḌte haiñ

na dil meñ ghar na jā mahfil meñ yaañ bhī baiThnā mushkil

tire kūche meñ ab zālim kab apne paañv gaḌte haiñ

sahar ko ro.uuñ yā un ko manā.ūñ dil ko yā rokūñ

ye qismat va.ade kī shab jhagḌe sau sau aan paḌte haiñ

kabhī jhiḌkī kabhī gaalī kabhī kuchh hai kabhī kuchh hai

bane kyuuñ kar ki sau sau baar ik dam meñ bigaḌte haiñ

'nizām' un kī ḳhamoshī meñ bhī sadhā lutf haiñ lekin

jo bāteñ karte haiñ to muñh se goyā phuul jhaḌte haiñ

wo bigDe hain ruke baiThe hain jhunjlate hain laDte hain

kabhi hum joDte hain hath gahe panw paDte hain

gae hain hosh aise gar kahin jaane ko uThta hun

to jata hun idhar ko aur udhar ko panw paDte hain

hamara le ke dil kya ek bosa bhi nahin denge

wo yun dil mein to raazi hain magar zahir jhagaDte hain

jo tum ko ek shikayat hai to mujh ko lakh shikwe hain

lo aao mil bhi jao ye kahin qisse nabaDte hain

udhar wo aur aaina hai aur kakul banana hai

idhar wahm aur KHamoshi hai aur dil mein bigaDte hain

yahan to sab hamari jaan ko naseh ban ke aate hain

wahan jate hue dil chhuTte hain dam ukhaDte hain

na dil mein ghar na ja mahfil mein yan bhi baiThna mushkil

tere kuche mein ab zalim kab apne panw gaDte hain

sahar ko roun ya un ko manaun dil ko ya rokun

ye qismat wade ki shab jhagDe sau sau aan paDte hain

kabhi jhiDki kabhi gali kabhi kuchh hai kabhi kuchh hai

bane kyun kar ki sau sau bar ek dam mein bigaDte hain

'nizam' un ki KHamoshi mein bhi sadha lutf hain lekin

jo baaten karte hain to munh se goya phul jhaDte hain