wo bujh gaya to andheron ko bhi malal raha

vo bujh gayā to añdheroñ ko bhī malāl rahā

vo ik charāġh jo jalne meñ bhī be-misāl rahā

kabhī bhulā na sakā dil-shikastagī apnī

juḌā to juḌ ke bhī us aa.ine meñ baal rahā

mirī hayāt ne hātim banā diyā mujh ko

har ik savāl ke ba.ad ik nayā savāl rahā

hamesha maiñ ne bhī nākāmiyoñ se kaam liyā

tamām-umr mirā 'mīr' jaisā haal rahā

tumhāre ba.ad kisī se fareb khāyā nahīñ

tumhārā mujh se bichhaḌnā bhī nek-fāl rahā

ġhamoñ ko haavī na hone diyā kabhī dil par

shab-e-firāq bhī zikr-e-shab-e-visāl rahā

kahāñ haram hai kidhar ka.aba hai kidhar ruḳh hai

namāz-e-ishq meñ us kā kahāñ ḳhayāl rahā

ġhazal usī kī thī haavī tamām ġhazloñ par

vahāñ bhī raunaq-e-bazm-e-suḳhan 'kamāl' rahā

wo bujh gaya to andheron ko bhi malal raha

wo ek charagh jo jalne mein bhi be-misal raha

kabhi bhula na saka dil-shikastagi apni

juDa to juD ke bhi us aaine mein baal raha

meri hayat ne hatim bana diya mujh ko

har ek sawal ke baad ek naya sawal raha

hamesha main ne bhi nakaamiyon se kaam liya

tamam-umr mera 'mir' jaisa haal raha

tumhaare baad kisi se fareb khaya nahin

tumhaara mujh se bichhaDna bhi nek-fal raha

ghamon ko hawi na hone diya kabhi dil par

shab-e-firaq bhi zikr-e-shab-e-visal raha

kahan haram hai kidhar kaba hai kidhar ruKH hai

namaz-e-ishq mein us ka kahan KHayal raha

ghazal usi ki thi hawi tamam ghazlon par

wahan bhi raunaq-e-bazm-e-suKHan 'kamal' raha