wo but pari hai nikalen na baal-o-par tawiz

vo but parī hai nikāleñ na bāl-o-par ta.avīz

haiñ donoñ baazū pe is ke idhar udhar ta.avīz

vo ham nahīñ jo hoñ dīvāne aise kāmoñ se

kise pilāte ho paanī meñ ghol kar ta.avīz

uThegā phir na kaleje meñ mīThā mīThā dard

agar likhe mire dil par tirī nazar ta.avīz

kahāñ vo log ki jin ke amal kā shohrā thā

kuchh is zamāne meñ rakhtā nahīñ asar ta.avīz

pilāyā saañp ko paanī jo man nikāl liyā

nahāne baiThe haiñ choTī se khol kar ta.avīz

vahāñ gayā jo koī dil hī bhuul kar aayā

rakhe haiñ gaaḌ ke us ne idhar udhar ta.avīz

pas-e-fanā bhī mohabbat kā silsila na miTā

tire gale meñ hai aur merī qabr par ta.avīz

ye bhed hai ki na murde Dareñ farishtoñ se

banā ke qabr banāte haiñ qabr par ta.avīz

ye kyā ki zulf meñ rakkhā hai bāñdh kar mirā dil

use bhī ghol ke pī jaao jaan kar ta.avīz

jo chāñd se haiñ badan haiñ vo chāñd tāroñ meñ

guloñ meñ haikaleñ haikal ke tā-kamar ta.avīz

hue haiñ hazrat-e-'mā.il' bhī dil meñ ab qaa.il

kuchh aisā likhtī hai ai jaañ tirī nazar ta.avīz

wo but pari hai nikalen na baal-o-par tawiz

hain donon bazu pe is ke idhar udhar tawiz

wo hum nahin jo hon diwane aise kaamon se

kise pilate ho pani mein ghol kar tawiz

uThega phir na kaleje mein miTha miTha dard

agar likhe mere dil par teri nazar tawiz

kahan wo log ki jin ke amal ka shohra tha

kuchh is zamane mein rakhta nahin asar tawiz

pilaya sanp ko pani jo man nikal liya

nahane baiThe hain choTi se khol kar tawiz

wahan gaya jo koi dil hi bhul kar aaya

rakhe hain gaD ke us ne idhar udhar tawiz

pas-e-fana bhi mohabbat ka silsila na miTa

tere gale mein hai aur meri qabr par tawiz

ye bhed hai ki na murde Daren farishton se

bana ke qabr banate hain qabr par tawiz

ye kya ki zulf mein rakkha hai bandh kar mera dil

use bhi ghol ke pi jao jaan kar tawiz

jo chand se hain badan hain wo chand taron mein

gulon mein haikalen haikal ke ta-kamar tawiz

hue hain hazrat-e-'mail' bhi dil mein ab qail

kuchh aisa likhti hai ai jaan teri nazar tawiz