wo buDha ek KHwab hai aur ek KHwab mein aata rahta hai

vo būḌhā ik ḳhvāb hai aur ik ḳhvāb meñ aatā rahtā hai

is ke sar par an-dekhā panchhī mañDlātā rahtā hai

nāTak ke kirdāroñ meñ kuchh sachche haiñ kuchh jhūTe haiñ

parde ke pīchhe koī un ko samjhātā rahtā hai

bastī meñ jab chāk-garebāñ girya karte phirte haiñ

is mausam meñ ek rafū-gar hañstā gaatā rahtā hai

har kirdār ke pīchhe pīchhe chal detā hai qissa-go

yūñhī baiThe baiThe apnā kaam baḌhātā rahtā hai

is din bhī jab bastī meñ talvāreñ kam paḌ jaatī haiñ

ek mudabbir āhan-gar zanjīr banātā rahtā hai

āvāzoñ kī bhiiḌ meñ ik ḳhāmosh musāfir dhīre se

nā-mānūs dhunoñ meñ koī saaz bajātā rahtā hai

dekhne vaalī āñkheñ haiñ aur dekh nahīñ pātīñ kuchh bhī

is manzar meñ jaane kyā kuchh aatā jaatā rahtā hai

is dariyā kī tah meñ 'ādil' ek purānī kashtī hai

ik girdāb musalsal us kā bojh baḌhātā rahtā hai

wo buDha ek KHwab hai aur ek KHwab mein aata rahta hai

is ke sar par an-dekha panchhi manDlata rahta hai

naTak ke kirdaron mein kuchh sachche hain kuchh jhuTe hain

parde ke pichhe koi un ko samjhata rahta hai

basti mein jab chaak-gareban girya karte phirte hain

is mausam mein ek rafu-gar hansta gata rahta hai

har kirdar ke pichhe pichhe chal deta hai qissa-go

yunhi baiThe baiThe apna kaam baDhata rahta hai

is din bhi jab basti mein talwaren kam paD jati hain

ek mudabbir aahan-gar zanjir banata rahta hai

aawazon ki bhiD mein ek KHamosh musafir dhire se

na-manus dhunon mein koi saz bajata rahta hai

dekhne wali aankhen hain aur dekh nahin patin kuchh bhi

is manzar mein jaane kya kuchh aata jata rahta hai

is dariya ki tah mein 'adil' ek purani kashti hai

ek girdab musalsal us ka bojh baDhata rahta hai