wo chaal aTkheliyon se chal kar dil o jigar raunde Dalte hain

vo chaal aTkheliyoñ se chal kar dil o jigar rauñde Dālte haiñ

abhī javānī kā hai jo aalam na dekhte haiñ na bhālte haiñ

chalā hai pahlū se yaar uTh kar ġham-e-judā.ī ko Tālte haiñ

kabhī to ham dil ko thāmte haiñ kabhī jigar ko sambhālte haiñ

kabhī na jin ko lagāyā thā muñh gale meñ bāheñ vo Dālte haiñ

jo māñgtā huuñ maiñ ek bosa to aap āñkheñ nikālte haiñ

agar yahī hai talavvun un kā ḳhudā hī hai va.ada ho jo puurā

kahā thā kal aaj vasl hogā vo aaj phir kal pe Tālte haiñ

na qahr raftār-e-nāz Dhaa.e lachak na vaqt-e-ḳhirām aa.e

ḳhudā hī nāzuk kamar bachā.e ki pā.eñche vo sambhālte haiñ

na jāñ-ba-lab kyuuñ marīz-e-ġham ho pa.e-ayādat na aa.e dekho

masīh kahte haiñ log jin ko vo jaan kar maar Dālte haiñ

kabhī ye kahte haiñ dard-e-sar hai kabhī ye kahte haiñ ab sahar hai

sitam ye mushtāq-e-vasl par hai hazāroñ hiile nikālte haiñ

nikālūñ armān kyuuñ na jī ke ki mast hoñ jām-e-ishq pī ke

maiñ sadqe is apnī be-ḳhudī ke ki dauḌ kar vo sambhālte haiñ

kasī ke 'anjum' jo haiñ sikhā.e to haiñ nayā rañg aaj laa.e

ki chupke baiThe haiñ sar jhukā.e na bolte haiñ na chālte haiñ

wo chaal aTkheliyon se chal kar dil o jigar raunde Dalte hain

abhi jawani ka hai jo aalam na dekhte hain na bhaalte hain

chala hai pahlu se yar uTh kar gham-e-judai ko Talte hain

kabhi to hum dil ko thamte hain kabhi jigar ko sambhaalte hain

kabhi na jin ko lagaya tha munh gale mein bahen wo Dalte hain

jo mangta hun main ek bosa to aap aankhen nikalte hain

agar yahi hai talawwun un ka KHuda hi hai wada ho jo pura

kaha tha kal aaj wasl hoga wo aaj phir kal pe Talte hain

na qahr raftar-e-naz Dhae lachak na waqt-e-KHiram aae

KHuda hi nazuk kamar bachae ki paenche wo sambhaalte hain

na jaan-ba-lab kyun mariz-e-gham ho pae-ayaadat na aae dekho

masih kahte hain log jin ko wo jaan kar mar Dalte hain

kabhi ye kahte hain dard-e-sar hai kabhi ye kahte hain ab sahar hai

sitam ye mushtaq-e-wasl par hai hazaron hile nikalte hain

nikalun arman kyun na ji ke ki mast hon jam-e-ishq pi ke

main sadqe is apni be-KHudi ke ki dauD kar wo sambhaalte hain

kasi ke 'anjum' jo hain sikhae to hain naya rang aaj lae

ki chupke baiThe hain sar jhukae na bolte hain na chaalte hain