wo chandni mein jo Tuk sair ko nikalte hain

vo chāñdnī meñ jo Tuk sair ko nikalte haiñ

to mah ke tasht meñ ghī ke charāġh chalte haiñ

paḌe havas hī havas meñ hamesha galte haiñ

hamāre dekhiye armān kab nikalte haiñ

hujūm-e-āh hai āñkhoñ se ashk Dhalte haiñ

bhare haiñ chaav jo dil meñ so yuuñ nikalte haiñ

charāġh-e-sub.h ye kahtā hai āftāb ko dekh

ye bazm tum ko mubārak ho ham to chalte haiñ

ba-rañg-e-ashk kabhī gir ke ham na sambhle aah

yahī kahā kiye jī meñ ki ab sambhalte haiñ

nikāltā hai hameñ phir vo apne kūche se

abhī to nikle nahīñ haiñ par ab nikalte haiñ

fidā jo dil se hai in shoḳh sabza rañgoñ par

ye zālim us kī hī chhātī pe muuñg dalte haiñ

huā nahīf bhī yaañ tak ki hazrat-e-majnūñ

ye mujh se kahte haiñ aur haath apne malte haiñ

koī to pagḌī badaltā hai aur se lekin

miyāñ 'nazīr' ham ab tum se tan badalte haiñ

wo chandni mein jo Tuk sair ko nikalte hain

to mah ke tasht mein ghi ke charagh chalte hain

paDe hawas hi hawas mein hamesha galte hain

hamare dekhiye arman kab nikalte hain

hujum-e-ah hai aankhon se ashk Dhalte hain

bhare hain chaw jo dil mein so yun nikalte hain

charagh-e-subh ye kahta hai aaftab ko dekh

ye bazm tum ko mubarak ho hum to chalte hain

ba-rang-e-ashk kabhi gir ke hum na sambhle aah

yahi kaha kiye ji mein ki ab sambhalte hain

nikalta hai hamein phir wo apne kuche se

abhi to nikle nahin hain par ab nikalte hain

fida jo dil se hai in shoKH sabza rangon par

ye zalim us ki hi chhati pe mung dalte hain

hua nahif bhi yan tak ki hazrat-e-majnun

ye mujh se kahte hain aur hath apne malte hain

koi to pagDi badalta hai aur se lekin

miyan 'nazir' hum ab tum se tan badalte hain