wo chal ke naz se ai dil udhar ko dekhte hain

vo chal ke naaz se ai dil udhar ko dekhte haiñ

ham un kī chaal ko un kī nazar ko dekhte haiñ

ham un kī aañkh ko un kī nazar ko dekhte haiñ

vo bazm-e-ġhair meñ dekheñ kidhar ko dekhte haiñ

samajh meñ kuchh nahīñ aatā ye kyā qayāmat hai

sab ahl-e-hashr usī fitna-gar ko dekhte haiñ

na us ne jaan churā.ī na us ne muñh moḌā

ham un kī teġh ko apne jigar ko dekhte haiñ

hamārī tarah kisī ko ye kyā ujāḌegā

falak ko dekh ke ham apne ghar ko dekhte haiñ

hamārā haal koī dekhtā nahīñ 'safdar'

sab ahl-e-bazm unhīñ kī nazar ko dekhte haiñ

wo chal ke naz se ai dil udhar ko dekhte hain

hum un ki chaal ko un ki nazar ko dekhte hain

hum un ki aankh ko un ki nazar ko dekhte hain

wo bazm-e-ghair mein dekhen kidhar ko dekhte hain

samajh mein kuchh nahin aata ye kya qayamat hai

sab ahl-e-hashr usi fitna-gar ko dekhte hain

na us ne jaan churai na us ne munh moDa

hum un ki tegh ko apne jigar ko dekhte hain

hamari tarah kisi ko ye kya ujaDega

falak ko dekh ke hum apne ghar ko dekhte hain

hamara haal koi dekhta nahin 'safdar'

sab ahl-e-bazm unhin ki nazar ko dekhte hain