wo charagh-e-jaan ki charagh tha kahin rahguzar mein bujh gaya

vo charāġh-e-jāñ ki charāġh thā kahīñ rahguzār meñ bujh gayā

maiñ jo ik sho.ala-nazhād thā havas-e-qarār meñ bujh gayā

mujhe kyā ḳhabar thī tirī jabīñ kī vo raushnī mire dam se thī

maiñ ajiib sāda-mizāj thā tire e'tibār meñ bujh gayā

mujhe rañj hai ki maiñ mausamoñ kī tavaqquāt se kam rahā

mirī lau ko jis meñ amaañ milī maiñ usī bahār meñ bujh gayā

vo jo lams merī talab rahā vo jhulas gayā mirī khoj meñ

so maiñ us kī taab na lā sakā kaf-e-dāġh-dār meñ bujh gayā

jinheñ raushnī kā lihāz thā jinheñ apne ḳhvāb pe naaz thā

maiñ unhī kī saf meñ jalā kiyā maiñ usī qatār meñ bujh gayā

wo charagh-e-jaan ki charagh tha kahin rahguzar mein bujh gaya

main jo ek shoala-nazhad tha hawas-e-qarar mein bujh gaya

mujhe kya KHabar thi teri jabin ki wo raushni mere dam se thi

main ajib sada-mizaj tha tere e'tibar mein bujh gaya

mujhe ranj hai ki main mausamon ki tawaqquat se kam raha

meri lau ko jis mein aman mili main usi bahaar mein bujh gaya

wo jo lams meri talab raha wo jhulas gaya meri khoj mein

so main us ki tab na la saka kaf-e-dagh-dar mein bujh gaya

jinhen raushni ka lihaz tha jinhen apne KHwab pe naz tha

main unhi ki saf mein jala kiya main usi qatar mein bujh gaya