wo chashm-e-mast-e-naz jo baada-farosh ho

vo chashm-e-mast-e-nāz jo bāda-farosh ho

kāfir hai jis ko piine pilāne kā hosh ho

ai iztirāb-e-zabt-e-alam mauj-e-shauq kyā

dil Duub jaa.e ġham meñ zamāna ḳhamosh ho

āñdhī kā kyā qusūr hai bijlī kī kyā ḳhatā

gulchīñ hī jab bahār-e-gulistāñ-farosh ho

chashm-e-karam kī mujh ko tamanna nahīñ magar

merī tabāhiyoñ kā unheñ kuchh to hosh ho

ai ḳhāliq-e-bahār ye insāf hai tirā

koī qafas meñ koī gulistāñ-badosh ho

kaisā ḳhayāl aaj azāb-o-savāb kā

aa.ī bahār mashġhala-e-nāo-nosh ho

is vāste hijāb-e-tajallī meñ chhup rahe

mere junūn-e-shauq-e-mohabbat meñ josh ho

ai be-ḳhudī-e-kaif-e-junūñ ai ġham-e-tamām

apnā nahīñ na ho mujhe un kā to hosh ho

dekh ai 'vakīl' dil meñ ḳhayāl-e-fuġhāñ ġhalat

ye un kī bazm-e-nāz hai zālim ḳhamosh ho

wo chashm-e-mast-e-naz jo baada-farosh ho

kafir hai jis ko pine pilane ka hosh ho

ai iztirab-e-zabt-e-alam mauj-e-shauq kya

dil Dub jae gham mein zamana KHamosh ho

aandhi ka kya qusur hai bijli ki kya KHata

gulchin hi jab bahaar-e-gulistan-farosh ho

chashm-e-karam ki mujh ko tamanna nahin magar

meri tabahiyon ka unhen kuchh to hosh ho

ai KHaliq-e-bahaar ye insaf hai tera

koi qafas mein koi gulistan-badosh ho

kaisa KHayal aaj azab-o-sawab ka

aai bahaar mashghala-e-nao-nosh ho

is waste hijab-e-tajalli mein chhup rahe

mere junun-e-shauq-e-mohabbat mein josh ho

ai be-KHudi-e-kaif-e-junun ai gham-e-tamam

apna nahin na ho mujhe un ka to hosh ho

dekh ai 'wakil' dil mein KHayal-e-fughan ghalat

ye un ki bazm-e-naz hai zalim KHamosh ho