wo chashm-e-naz agar KHud ko waqf-e-naz kare

vo chashm-e-nāz agar ḳhud ko vaqf-e-nāz kare

har ahl-e-qalb-o-nazar ḳham sar-e-niyāz kare

gadā ko shaah to shah ko gadā-navāz kare

jise bhī jis tarah chāhe vo sarfarāz kare

haqīqat-e-basharī kyā hai qatra-e-nāchīz

zabāñ na had se ziyāda bashar darāz kare

tirā ġhulām ba-sad-ehtirām hāzir hai

tirī ḳhushī hai agar is ko sarfarāz kare

ḳhudā hai qādir-e-mutlaq bashar ko lāzim hai

usī ke sāmne dast-e-talab darāz kare

jo bār-e-husn-e-azal koh-e-tūr sah na sake

qubūl us ko mirā qalb-e-pāk-bāz kare

kisī ke dam kī jo raunaq hai us kī hastī meñ

'ġhubār' kyoñ na bhalā aaj us pe naaz kare

wo chashm-e-naz agar KHud ko waqf-e-naz kare

har ahl-e-qalb-o-nazar KHam sar-e-niyaz kare

gada ko shah to shah ko gada-nawaz kare

jise bhi jis tarah chahe wo sarfaraaz kare

haqiqat-e-bashari kya hai qatra-e-nachiz

zaban na had se ziyaada bashar daraaz kare

tera ghulam ba-sad-ehtiram hazir hai

teri KHushi hai agar is ko sarfaraaz kare

KHuda hai qadir-e-mutlaq bashar ko lazim hai

usi ke samne dast-e-talab daraaz kare

jo bar-e-husn-e-azal koh-e-tur sah na sake

qubul us ko mera qalb-e-pak-baz kare

kisi ke dam ki jo raunaq hai us ki hasti mein

'ghubar' kyon na bhala aaj us pe naz kare