wo chup raha to hua is qadar malal mujhe

vo chup rahā to huā is qadar malāl mujhe

ki jaate jaate ka.ī de gayā savāl mujhe

ye sach hai aa na sakā maiñ kisī ke kaam magar

kahāñ rahā kabhī apnā bhī kuchh ḳhayāl mujhe

basā huā huuñ maiñ phūloñ meñ ḳhushbuoñ kī tarah

havā chalī to bikhar jā.ūñgā sañbhāl mujhe

usī ko merī ḳhamoshī qubūl-e-jurm lagī

kabhī na karne diyā jis ne 'arz-e-hāl mujhe

khulī zamīn meñ phal phuul jā.ūñgā ik din

tū is yaqīñ pe na gamle se ab nikāl mujhe

vo merā dost hai dushman hai kyā yaqīn karūñ

maiñ paat paat huuñ kartā hai Daal Daal mujhe

to kyā huā jo zamāna mujhe miTāne lagā

banā rahā hai vo sab ke liye misāl mujhe

na jaane kis ke ḳhayāloñ meñ ā.ūñgā 'balrāj'

na jaane kaun kabhī degā ḳhadd-o-ḳhāl mujhe

wo chup raha to hua is qadar malal mujhe

ki jate jate kai de gaya sawal mujhe

ye sach hai aa na saka main kisi ke kaam magar

kahan raha kabhi apna bhi kuchh KHayal mujhe

basa hua hun main phulon mein KHushbuon ki tarah

hawa chali to bikhar jaunga sanbhaal mujhe

usi ko meri KHamoshi qubul-e-jurm lagi

kabhi na karne diya jis ne 'arz-e-haal mujhe

khuli zamin mein phal phul jaunga ek din

tu is yaqin pe na gamle se ab nikal mujhe

wo mera dost hai dushman hai kya yaqin karun

main pat pat hun karta hai Dal Dal mujhe

to kya hua jo zamana mujhe miTane laga

bana raha hai wo sab ke liye misal mujhe

na jaane kis ke KHayalon mein aaunga 'balraj'

na jaane kaun kabhi dega KHadd-o-KHal mujhe