wo dariya-bar ashkon ki jhaDi hai

vo dariyā-bār ashkoñ kī jhaḌī hai

ki hūt-e-āsmāñ tah meñ paḌī hai

mire armāñ butoñ kī sard-mehrī

zarā'at barf ke paale paḌī hai

chaman meñ sarv kā bahrūp bhar kar

qayāmat muntazar kis kī khaḌī hai

dahān-e-tañg ġhuncha patiyāñ lab

hañsī hai phuul fiqra pankhuḌī hai

lagā dī aag kis sho'la ne bulbul

har ik phūloñ kī Tahnī phuljhaḌī hai

nigāh-e-yās kis kī kar ga.ī choT

ki gardan teġh kī Dhalkī paḌī hai

'anāsir jald pahuñchā deñge tā-gor

nihāyat tez-rau ye chaukḌī hai

kafan se muñh lapeTe merī hasrat

dil-e-vīrāñ ke kone meñ paḌī hai

sirhāne mudda'ī aayā to jaanā

judā.ī kī ghaḌī sar par khaḌī hai

kisī ko paar utāregā falak kyā

usī kī naav chakkar meñ paḌī hai

banā le 'aql aag kā putlā falātūñ

ki talchhaT kuchh mire ḳhum meñ paḌī hai

nasha hai aur hiran haiñ us kī āñkheñ

nazar-bāzī hiran kī chaukḌī hai

nigāh-e-shauq se siina churāyā

hamārī choT tum se bhī kaḌī hai

balā-e-zulf-e-mehmāñ se kahūñ kyā

nahīñ Taltī mire sar aa paḌī hai

siyāhī duur hogī rafta rafta

abhī zāhid kī dāḌhī kaḌbaḌī hai

sar-e-mahshar baḌhī hai kis qadar zulf

qayāmat kis qadar ochhī paḌī hai

guhar-bīñ hai nizām-ul-mulk apnā

tabī'at kyā 'bayāñ' qismat laḌī hai

wo dariya-bar ashkon ki jhaDi hai

ki hut-e-asman tah mein paDi hai

mere arman buton ki sard-mehri

zara'at barf ke pale paDi hai

chaman mein sarw ka bahrup bhar kar

qayamat muntazar kis ki khaDi hai

dahan-e-tang ghuncha patiyan lab

hansi hai phul fiqra pankhuDi hai

laga di aag kis sho'la ne bulbul

har ek phulon ki Tahni phuljhaDi hai

nigah-e-yas kis ki kar gai choT

ki gardan tegh ki Dhalki paDi hai

'anasir jald pahuncha denge ta-gor

nihayat tez-rau ye chaukDi hai

kafan se munh lapeTe meri hasrat

dil-e-viran ke kone mein paDi hai

sirhane mudda'i aaya to jaana

judai ki ghaDi sar par khaDi hai

kisi ko par utarega falak kya

usi ki naw chakkar mein paDi hai

bana le 'aql aag ka putla falatun

ki talchhaT kuchh mere KHum mein paDi hai

nasha hai aur hiran hain us ki aankhen

nazar-bazi hiran ki chaukDi hai

nigah-e-shauq se sina churaya

hamari choT tum se bhi kaDi hai

bala-e-zulf-e-mehman se kahun kya

nahin Talti mere sar aa paDi hai

siyahi dur hogi rafta rafta

abhi zahid ki daDhi kaDbaDi hai

sar-e-mahshar baDhi hai kis qadar zulf

qayamat kis qadar ochhi paDi hai

guhar-bin hai nizam-ul-mulk apna

tabi'at kya 'bayan' qismat laDi hai