wo dariya hai koi sahra nahin hai

vo dariyā hai koī sahrā nahīñ hai

magar pur-josh bhī lagtā nahīñ hai

tujhe terā samundar ho mubārak

hamārī pyaas se achchhā nahīñ hai

vahī bārish kā charchā kar rahe haiñ

badan jin kā kabhī bhīgā nahīñ hai

kabhī dekhā nahīñ hai ham ne varna

zamīñ kī vus.atoñ meñ kyā nahīñ hai

abhī se aa ga.ī hai raat milne

abhī to chāñd bhī niklā nahīñ hai

nigāheñ tak rahī haiñ ghoñsle kī

parinda lauT kar aayā nahīñ hai

maiñ rukne ke liye aayā thā ghar meñ

kisī ne kyuuñ mujhe rokā nahīñ hai

kahāñ asrār apne pā sakegā

abhī ḳhud meñ koī bhaTkā nahīñ hai

sabhī kirdār achchhe lag raheñ haiñ

kahānī meñ koī sachchā nahīñ hai

mah-e-kan.āñ hai ahd-e-nā-rasā.ī

abhī bāzār tak pahuñchā nahīñ hai

zamīñ par zor hai jādūgaroñ kā

asā-e-hazrat-e-mūsā nahīñ hai

samundar to mathe jaatī hai duniyā

koī bhī vish magar piitā nahīñ hai

wo dariya hai koi sahra nahin hai

magar pur-josh bhi lagta nahin hai

tujhe tera samundar ho mubarak

hamari pyas se achchha nahin hai

wahi barish ka charcha kar rahe hain

badan jin ka kabhi bhiga nahin hai

kabhi dekha nahin hai hum ne warna

zamin ki wusaton mein kya nahin hai

abhi se aa gai hai raat milne

abhi to chand bhi nikla nahin hai

nigahen tak rahi hain ghonsle ki

parinda lauT kar aaya nahin hai

main rukne ke liye aaya tha ghar mein

kisi ne kyun mujhe roka nahin hai

kahan asrar apne pa sakega

abhi KHud mein koi bhaTka nahin hai

sabhi kirdar achchhe lag rahen hain

kahani mein koi sachcha nahin hai

mah-e-kanan hai ahd-e-na-rasai

abhi bazar tak pahuncha nahin hai

zamin par zor hai jadugaron ka

asa-e-hazrat-e-musa nahin hai

samundar to mathe jati hai duniya

koi bhi wish magar pita nahin hai