wo dekh kar na ruka aur guzar gae hum bhi

vo dekh kar na rukā aur guzar ga.e ham bhī

duā-e-shab kī tarah be-asar ga.e ham bhī

samā.atoñ ke jazīre talak rasā.ī na thī

vo be-ḳhabar hī rahā be-samar ga.e ham bhī

yahī kaheñge ki ik ḳhauf thā bulandī kā

kisī ke bām-e-nazar se utar ga.e ham bhī

milā vo zor-e-tasavvur subuk-irāda hue

musībat aane se pahle hī Dar ga.e ham bhī

shanāvarī pe kahīñ harf hī na aa jaa.e

agar tarāsh ke dariyā guzar ga.e ham bhī

ḳhudā bhī to kabhī yaksāniyat se uktā.e

kamāl kaun sā hogā jo mar ga.e ham bhī

sadā-e-ḳhvāb to the aise chuur chuur hue

ġhubār ban ke fazā meñ bikhar ga.e ham bhī

wo dekh kar na ruka aur guzar gae hum bhi

dua-e-shab ki tarah be-asar gae hum bhi

samaaton ke jazire talak rasai na thi

wo be-KHabar hi raha be-samar gae hum bhi

yahi kahenge ki ek KHauf tha bulandi ka

kisi ke baam-e-nazar se utar gae hum bhi

mila wo zor-e-tasawwur subuk-irada hue

musibat aane se pahle hi Dar gae hum bhi

shanawari pe kahin harf hi na aa jae

agar tarash ke dariya guzar gae hum bhi

KHuda bhi to kabhi yaksaniyat se uktae

kamal kaun sa hoga jo mar gae hum bhi

sada-e-KHwab to the aise chur chur hue

ghubar ban ke faza mein bikhar gae hum bhi