wo dekhte jate hain kanakhiyon se idhar bhi

vo dekhte jaate haiñ kanakhiyoñ se idhar bhī

chaltā huā jaadū hai mohabbat kī nazar bhī

uThne kī nahīñ dekhiye shamshīr-e-nazar bhī

pahle hī lachaktī hai kalā.ī bhī kamar bhī

phūTeñ mirī āñkheñ jo kuchh aatā ho nazar bhī

duniyā se alag chiiz hai furqat kī sahar bhī

saaqī kabhī mil jaa.e mohabbat kā samar bhī

in āñkhoñ kā sadqa koī sāġhar to idhar bhī

betāb huuñ kyā chiiz churā lī hai nazar ne

hone ko to dil bhī hai mire paas jigar bhī

ghar samjhā huuñ jis ko kahīñ turbat to nahīñ hai

aatī hai yahāñ shaam kī sūrat meñ sahar bhī

ḳhāmosh huuñ maiñ aur vo kuchh pūchh rahe haiñ

māthe pe shikan bhī hai ināyat kī nazar bhī

us ke lab-e-rañgīñ kī nazākat hai na rañgat

ġhunche bhī bahut dekh liye haiñ gul-e-tar bhī

aatī hai nazar duur hī se husn kī ḳhūbī

kuchh aur hī hotī hai javānī kī nazar bhī

haTtī hai jo ā.īna se paḌ jaatī hai dil par

kyā shoḳh nazar hai ki udhar bhī hai idhar bhī

bīmār-e-mohabbat kā ḳhudā hai jo sambhal jaa.e

hai shaam bhī maḳhdūsh judā.ī kī sahar bhī

mai-ḳhāna-e-ishrat na sahī kunj-e-garebāñ

āñkhoñ ke chhalakte hue sāġhar haiñ idhar bhī

mil jaa.eñ agar mujh ko to maiñ ḳhizr se pūchhūñ

dekhī hai kahīñ shām-e-judā.ī kī sahar bhī

ai shauq-e-shahādat kahīñ qismat na palaT jaa.e

bāñdhī to hai talvār bhī qātil ne kamar bhī

ai dil tirī aaheñ to sunīñ kānoñ se ham ne

ab ye tū batā us pe kareñgī ye asar bhī

ik rashk kā pahlū to hai samjhūñ ki na samjhūñ

gardan bhī hai ḳham aap kī nīchī hai nazar bhī

kuchh kaan meñ kal aap ne irshād kiyā thā

mushtāq usī baat kā huuñ bār-e-digar bhī

sofār bhī rañgīn kiye haath bhī us ne

aayā hai baḌe kaam merā ḳhūn-e-jigar bhī

chhuptī hai koī baat chhupā.e se sar-e-bazm

uḌte ho jo tum ham se to uḌtī hai ḳhabar bhī

yuuñ hijr meñ barsoñ kabhī lagtī hī nahīñ aañkh

so jaatā huuñ jab aa ke vo kah detī haiñ mar bhī

khultā hī nahīñ beḳhud-e-badnām kā kuchh haal

kahte haiñ farishta bhī use log bashar bhī

wo dekhte jate hain kanakhiyon se idhar bhi

chalta hua jadu hai mohabbat ki nazar bhi

uThne ki nahin dekhiye shamshir-e-nazar bhi

pahle hi lachakti hai kalai bhi kamar bhi

phuTen meri aankhen jo kuchh aata ho nazar bhi

duniya se alag chiz hai furqat ki sahar bhi

saqi kabhi mil jae mohabbat ka samar bhi

in aankhon ka sadqa koi saghar to idhar bhi

betab hun kya chiz chura li hai nazar ne

hone ko to dil bhi hai mere pas jigar bhi

ghar samjha hun jis ko kahin turbat to nahin hai

aati hai yahan sham ki surat mein sahar bhi

KHamosh hun main aur wo kuchh puchh rahe hain

mathe pe shikan bhi hai inayat ki nazar bhi

us ke lab-e-rangin ki nazakat hai na rangat

ghunche bhi bahut dekh liye hain gul-e-tar bhi

aati hai nazar dur hi se husn ki KHubi

kuchh aur hi hoti hai jawani ki nazar bhi

haTti hai jo aaina se paD jati hai dil par

kya shoKH nazar hai ki udhar bhi hai idhar bhi

bimar-e-mohabbat ka KHuda hai jo sambhal jae

hai sham bhi maKHdush judai ki sahar bhi

mai-KHana-e-ishrat na sahi kunj-e-gareban

aankhon ke chhalakte hue saghar hain idhar bhi

mil jaen agar mujh ko to main KHizr se puchhun

dekhi hai kahin sham-e-judai ki sahar bhi

ai shauq-e-shahadat kahin qismat na palaT jae

bandhi to hai talwar bhi qatil ne kamar bhi

ai dil teri aahen to sunin kanon se hum ne

ab ye tu bata us pe karengi ye asar bhi

ek rashk ka pahlu to hai samjhun ki na samjhun

gardan bhi hai KHam aap ki nichi hai nazar bhi

kuchh kan mein kal aap ne irshad kiya tha

mushtaq usi baat ka hun bar-e-digar bhi

sofar bhi rangin kiye hath bhi us ne

aaya hai baDe kaam mera KHun-e-jigar bhi

chhupti hai koi baat chhupae se sar-e-bazm

uDte ho jo tum hum se to uDti hai KHabar bhi

yun hijr mein barson kabhi lagti hi nahin aankh

so jata hun jab aa ke wo kah deti hain mar bhi

khulta hi nahin beKHud-e-badnam ka kuchh haal

kahte hain farishta bhi use log bashar bhi