وہ دل جو کشتۂ غم سود و زیاں نہ تھا

وہ دل جو کشتۂ غم سود و زیاں نہ تھا

شائستۂ نوازش دور جہاں نہ تھا

کب مجھ کو لطف اہل محبت نہ تھا نصیب

کب میرا دل متاع غم دوستاں نہ تھا

جز تیری یاد کے نہ تھی دل سوز کوئی یاد

جز تیرے غم کے دل پہ کوئی غم گراں نہ تھا

دل اور غم کے ربط نے مجبور کر دیا

یوں ورنہ ہر قدم پہ کبھی امتحاں نہ تھا

وہ مل گیا ہے اب مجھے اپنی خبر ہو کیوں

تھی اس کی جستجو تو یہ بندہ کہاں نہ تھا

تم تو ہر ایک حسن کو پہچانتے ہو خوب

گل کی چٹک میں کیا مرا حسن بیاں نہ تھا